پارتی داوا لە عێراق دەكات لەسەر داربڕینەوەی توركیا هەڵوێستی هەبێت

پۆڵەتیك پرێس

فراكسیۆنی پارتی لە پەرلەمانی كوردستان داوا لە حكومەتی عێراق دەكات لە پرسی بڕینەوەی دارەكانی سنوری دهۆك هەڵوێستی هەبێت و لە شەڕی نێوان پەكەكە و توركیا بێلایەن نەبێت، لەگەڵ دەوڵەتی توركیا قسە بكەن و پەیامێكی ڕوونیش بدەنە پەكەكە.

فراكسیۆنی پارتی لە پەرلەمانی كوردستان بەیاننامەیەكی بڵاوكردەوە و رایگەیاند: ئێمە نەك ئێستا لەسەر داربڕین بەڵكو لە ڕابردووش ڕامانگەیاندووە با چیدی خەڵكی سڤیل نەبنە قوربانی و شەهید نەكرێن، با ئەم كێشەیە لەناو خاكی توركیا چارەسەر بكرێت و خەڵكی هەرێمی كوردستان و ژینگەی كوردستان و ئاژەڵ و سروشتی كوردستان نەبنە قوربانی ئەم شەڕە.

دەقی بەیاننامەكە:

بەداخەوە شەڕی پەكەكە و توركیا هەمیشە ماڵوێرانی بۆ سەر ژیان و ژینگەی كوردستان و كاول كردنی گوندەكان و نەهێشتنی ژیان هەبووە لە ناوچە سنوورییەكاندا.

ئێمە نەك ئێستا لەسەر داربڕین بەڵكو لە ڕابردووش ڕامانگەیاندووە با چیدی خەڵكی سڤیل نەبنە قوربانی و شەهید نەكرێن، با ئەم كێشەیە لەناو خاكی توركیا چارەسەر بكرێت و خەڵكی هەرێمی كوردستان و ژینگەی كوردستان و ئاژەڵ و سروشتی كوردستان نەبنە قوربانی ئەم شەڕە.

وەك چۆن داوا لەحكوومەتی توركیا دەكەین خەڵكی سڤیل و سروشتی كوردستان و گوندەكانمان نەكات قوربانی كێشەی خۆی لەگەڵ پەكەكە، لە هەمانكاتدا دەڵێین پەكەكە هەمیشە بیانووی داوەتە دەست توركیا و بە بەرپرسیارییەتەوە مامەڵەی لەگەڵ دۆخی هەستیار و ناسكی هەرێمی كوردستان نەكردووە، بە پێچەوانەوە دەیانەوێت هەرێمی كوردستان تێوەبگلێنن و خەڵك و سروشت و خاكی كوردستان باجی ئەو بیانووانە بدات كە ئەوان دەیدەنە دەست حكوومەتی توركیا.

لێرەشەوە داوا لە حكوومەتی عێراقی دەكەین هەڵوێستیان هەبێت و لەم كێشەیە بێلایەن نەبن هەم لەگەڵ دەوڵەتی توركیا قسە بكەن و هەم پەیامێكی ڕوون بدەنە پەكەكە.

هەر لەمبارەیەوە یاداشتێكمان ئامادەكردووە بۆ سەرۆكایەتی پەرلەمانی كوردستان و داوای ڕێكاری پێویستی پەرلەمانی و دانیشتنی تایبەت دەكەین لەسەر ئەم پرسە.

فراكسیۆنی پارتی لە پەرلەمانی كوردستان