پۆڵەتیك پرێس
لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress
نێچیرڤان بارزانی سەرۆكی هەرێمی كوردستان، لە پەیوەندییەكی تەلەفۆنیدا لەگەڵ بافڵ جەلال تاڵەبانی سەرۆكی یەكێتیی نیشتمانیی كوردستان، لە یادی 47 ساڵەی دامەزراندنی یەكێتیی نیشتمانیی كوردستاندا، پیرۆزبایی لە سەركرایەتی و ئەندامان و جەماوەری یەكێتی كرد.
سەرۆكایەتی هەرێمی كوردستان بڵاوی كردەوە، نێچیرڤان بارزانی وێڕای ئاما‌ژەدان بە ڕۆڵی كاریگەری یەكێتیی نیشتمانیی كوردستان و سەرۆك مام جەلال لە بزاڤی ڕزگاریخوازیی كوردستاندا، هەموو ئەو تێكۆشەر و پێشمەرگە قارەمانانەی بە بیر هێنایەوە كە لە پێناو ئازادیی كوردستان و لە ڕیزەكانی یەكێتیدا، خەباتیان كردووە و قوربانییان داوە.
نێچیرڤان بارزانی دووپاتی لە پێویستیی كاری هاوبەش و پێكەوەیی و تەبایی و یەكڕیزیی نێوان تەواوی لایەنە كوردستانییەكان كردەوە، لە پێناو پاراستنی فیدراڵی و قەوارەی سیاسیی هەرێمی كوردستان و مافە دەستوورییەكانی گەلی كوردستاندا. هەر لەمبارەیەوە ڕۆڵی یەكێتیی نیشتمانیی كوردستانی بە گرنگ و كاریگەر لە قەڵەم دا.
لای خۆیەوە بافڵ جەلال تاڵەبانی سەرۆكی یەكێتیی نیشتمانیی كوردستان، سوپاس و پێزانینی خۆی و یەكێتیی نیشتمانیی كوردستانی بۆ پیرۆزبایی و پێوەندیی سەرۆكی هەرێم دەربڕی و هەوڵەكانی نێچیرڤان بارزانیی لە پێناو یەكڕیزی و كۆكردنەوەی لایەنە سیاسییەكاندا، بەرز نرخاند.
قەیوان گروپ
مایۆرکا سیتی جوانییەک لە دڵی سروشتدا
