پۆڵەتیك پرێس
لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress
وەزارەتی بەرگری بەریتانیا لە رێگەی كونسوڵخانەی وڵاتەكەی لە هەولێر، پرسە و سەرەخۆشی لە وەزارەتی پێشمەرگە و خانەوادە و كەس و كاری شەهیدانی پێشمەرگە دەكات، كە شەوی رابردوو لە ئەنجامی هێرشێكی داعشدا لە سنووری پردێ شەهیدبوون.
لەو پرسەنامەیەدا، كە ئاراستەی شۆڕش ئیسماعیل، وەزیری پێشمەرگە و سەربەست لەزگین، بریكاری وەزارەت و خانەوادە و تەواوی هێزەكانی پێشمەرگە كراوە و تیایدا هاوخەمی قووڵی خۆیان بۆ ئەو پەلامارە تیرۆریستیە دەربڕیوە و پشتیوانی و پشتگیری بەریتانیایان بۆ هێزەكانی پێشمەرگە و وەزارەتی پێشمەرگە دووپاتكردۆتەوە.
دەقی پرسەنامەكەیە:
لە كۆڵۆنێڵ (سێر چارلس سایكس بی تی)یەوە بۆ عەمید روكن محەمەد سەعید لە وەزارەتی پێشمەرگەی حكومەتی هەرێمی كوردستان
بەناوی وەزارەتی بەرگری شانشینی یەكگرتووی بەریتانیا و كونسوڵی گشتی هەولێر، دەمەوێت سەرەخۆشی لە وەزیر و جێگرەكەی و هەموو پێشمەرگەكان بكەم، بەهۆی شەهیدبوونی خەمبارانەی دوو پێشمەرگەی قارەمان، كە شەوی ڕابردوو هەواڵەكەمان پێ گەیشتووە، تكایە سەرەخۆشیمان بۆ كەسوكاریان و هاوكاران و پێشمەرگە بریندا رەكان لەم كاتە خەمبارەدا لێ قەبوڵ بكەن.
بەردەوامبوونی نائارامی و توندوتیژی لە ناوچە كێشە لەسەرەكان، راستەوخۆ كاریگەری لەسەر ئاشتی و گەشەسەندنی ئەم هەرێمە بێوێنەیە دەبێت.
ئێمە پاڵپشتی ئێوە دەكەین لە شەڕی دژ بە داعش و دژی هەموو گروپە تیرۆریستییەكان، كە هەڕەشە دەكەن لە سەقامگیری و ئاسایشی ناوچەكە، ئێمە لەگەڵ هاوكارەكانمان لە هاوپەیمانی نێودەوڵەتی دژی داعش، بەردەوام دەبین لە پشتیوانی و پێشكەش كردنی هاوكاریەكانمان بۆ هێزەكانی پێشسمەرگە، هەروەها پشتیوانی لەو هەوڵ و كۆششە خێرایانە دەكەین، كە بۆ نوێكردنەوە و یەكخستنی هێزەكانی پێشمەرگە دەیدەن. بۆ باشتركردنی ئاسایشی ناوچە كێشە لەسەرەكانیش بە هاوبەشی لەگەڵ هێزەكانی عێراقی فیدراڵ هاوكار و پاڵپشت دەبین بە دڵسۆزییەوە.
چارلس سایكس
ڕاوێژكاری بەرگری تایبەت
لە كونسوڵخانەی گشتیی بەریتانیا لە هەولێر ـــ
هەرێمی كوردستانی عێراق
31ی تشرینی یەكەمی 2021