بەھۆی بومەلەرزەکەوە ٥٢٠ ھەزار یەکەی نیشتەجێبوون لە تورکیا رووخاون

موراد کۆڕووم وەزیری ژینگەی تورکیا، سەردانی ویلایەتی ئەدیامانی وڵاتەکەی کرد و رایگەیاند، پشکنینیان بۆ چوار ملیۆن و ٥١١ ھەزار یەکەی نیشتەجێبوون لە ١١ ویلایەتی تورکیا کردووە، بەو ئەنجامە گەیشتوون کە ٥٢٠ ھەزار یەکەی نیشتەجێبوون بەھۆی بوومەلەرزەکەوە رووخاون یان پێویستە بەپەلە بڕوخێندرێن.

ڕوونیشیکردەوە، حکومەتی ئەنقەرە لە ماوەی یەک ساڵدا قەرەبووی ھەموو ئەو کەسانە دەکاتەوە کە ماڵ و باڵەخانەکانیان زیانیان پێگەیشتووە.

بەرەبەیانی رۆژی شەشی ئەم مانگە، دوو بوومەلەرزەی بەھێز بە گوڕی ٧.٧ _ ٧.٦، باکور و رۆژئاوای کوردستان، تورکیا و سوریایان ھەژاند، بەھۆیانەوە تاکو ئێستا زیاتر لە ٥٠ ھەزار کەس گیانیانلەدەستداوە.