تاڵیبان: نامانەوێت بەزەبری هێز دەست بەسەر کابوڵدا بگرین

پۆڵەتیک پرێس

لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress

ئاژانسی رۆیتەرز لە زاری چەند شایەتحاڵێکەوە بڵاویکردەوە، چەکدارانی تاڵیبان چوونەتە کابوڵی پایتەختی ئەفغانستانەوە و تاڵیبانیش دەڵێت: نامانەوێت بەزەبری هێز دەست بەسەر کابوڵدا بگرین.

بزوتنەوەی تاڵیبان لە راگەیەندراوێکدا ئاشکرای کرد، “لەگەڵ حکومەتی ئەفغانستاندا دانوستان دەکەین بەمەبەستی ئەوەی بەشێوەیەکی پارێزراو دەسەڵات ئاڵوگۆڕ بکرێت و زیان بە ژیانی دانیشتوانی کابوڵ نەگات”.

ئاماژەی بەوەشکرد، دەستیگرتووە بەسەر ناوچەی باگرام لە ویلایەتی پەروان لە باکوری رۆژهەڵاتی کابوڵ، ئەمەش دوای چەند سەعاتێک لە کۆنتڕۆڵکردنی سنووری ئەفغانستان و پاکستان و شاری جەلال ئاباد.

هاوکات، باڵیۆزخانەی ئەمریکا داوای لە باڵیۆزخانەکانی دیکەی کابوڵ کرد هەستن بە کەمکردنەوە و گواستنەوەی کارمەندەکانیان لەو شارە.

لەلایەکی دیکەوە شایەتحاڵێک دەڵێت: دوکەڵ لە باڵیۆزخانەی ئەمریکا لە کابوڵ بەرزبووەتەوە و ئەگەر هەیە ئەو دوکەڵە لە ئەنجامی سوتاندنی بەڵگەنامە گرنگەکانی باڵیۆزخانەکەوە دروستبووبێت کە ئەمریکا نایەوێت بکەونەدەست تاڵیبان.

بەپرسێکی ئەمریکاش ئاماژەی بەوەکرد، لە ئێستادا کەمتر لە 50 کارمەندی ئەمریکی لە کابوڵ دەمێننەوە.

 

پەخشی راستەوخۆی رادیۆ پۆلەتیک