هێرشەکەی ناوچەی سەوز کاردانەوەی بەرپرسانی عێراقی لێدەکەوێتەوە

پۆڵەتیک پرێس

هێرشەکەی شەوی رابردووی ناوچەی سەوز لە بەغدا، کاردانەوەی چەند بەپرسێکی عێراقی لێکەوتەوە و داوایانکرد رێکاری ئەمنی پتەوتەر بۆ پاراستنی نێردە دیبلۆماسییەکان بگیرێتەبەر.

لەوبارەیەوە عەمار حەکیم، سەرۆکی رەوتی حیکمە رایگەیاند، ئەو هێرشانەی دەکرێنەسەر ناوچەی سەوز لە بەغدا ئابڕووی عێراق لەکەدار دەکەن و پایەی دەوڵەت لەبەردەم رای گشتیدا دەخەنە ژێر پرسیار و گومانەوە.

وتیشی: دووبارە داوا لە حکومەتی عێراق دەکەین رێکاری ئەمنی پێویست و پتەو بگرێتەبەر بۆ پاراستنی نێردە دیبلۆماسییەکان لە عێراق.

لەلایەکی دیکەوە ئەیاد عەلاوی، سەرۆکی هاوپەیمانی نیشتیمانی جەختی لەوەکردەوە، بەردەوامی بەئامانجگرتنی نێردە دیبلۆماسییەکان ئەنجامێکی مەترسیداری دەبێت و هەمووان بەبێ جیاوازی باجەکەی دەدەن.

هاوکات، موقتەدا سەدر سەرۆکی رەوتی سەدر رایگەیاند، دەبینم بەکارهێنانی چەک و بۆردومانکردن و بەئامانجگرتنی نێردە دیبلۆماسییەکانی عێراق تابێت زیاتر دەبێت، ئەمەش مەترسی بۆسەر گیانی هاوڵاتیانی مەدەنی دروست دەکات و پایەی دەوڵەت زیاتر و زیاتر لاوازدەکات.

ماوە ماوە باڵیۆزخانەی ئەمریکا لە عێراق لەڕێی موشەکی کاتیۆشاوە بەئامانج دەگیرێت، دوایین جاریش بۆردومانەکەی شەوی رابردوو بوو کاتێک چوار موشەک ئاراستەی بارەگایەکی نزیک لە باڵیۆزخانەکە کرا.