پۆڵەتیک پرێس
لە بڕیاری دەرکردنی لاهور جەنگی بورهاندا ئاماژە بە کۆمەڵێک بڕگەی پەیڕەوی ناوخۆی یەکێتی نیشتیمانی کوردستان کراوە کە لاهور جەنگی پێشێلیکردووە و بەپێی کۆمەڵێک ماددەی دیکەش سزادراوە.
بەپێی بڵاوکراوەی میدیاکانی یەکێتی، ئەندامانی یەکێتی نیشتیمانی کوردستان بەپێی ماددەی 11 مافی ئەندامبوون لەدەستدەدەن کاتێک، ئەندام ناپاکی سیاسی و نیشتیمانی و نەتەوەیی و حزبی ئەنجام بدات و لەکاتی هەڵمەتەکانی هەڵبژاردنە گشتییەکاندا کار بۆ پارتەکانی تر بکات.
هاوکات، بەپێی ماددەی 12، جۆرەکانی سزادان بریتین لە ئاگادارکردنەوە، سەرنجڕاکێشان، هەڵپەساردن، پلەداگرتن و دەرکردن.
لەو بڵاوکراوەیەدا هاتووە، ئەندام کاتێک سزای دەرکردنی بۆ دەردەچێت کە لە پەیڕەو و پڕۆگرام لابدات، کار دژ بە بەرژەوەندییە باڵاکانی گەل و نیشتیمان و دژ بە سیاسەتی یەکێتی نیشتیمانی کوردستان بکات و هەوڵی تێکدانی ڕیزەکانی بدات.
هاوکات، یەکێکی دیکە لە هۆکارەکانی دەرکردن ئەوەیە، ئەندام پێگە حزبییەکەی بۆ بەرژەوەندی خۆی بەکاربهێنێت و بەرژەوەندی تایبەتی خۆی بخاتە سەرووی بەرژەوەندییەکانی یەکێتی نیشتیمانی کوردستان.
هۆکارەکانی دیکە:
– درکاندنی نهێنییەکانی یەکێتی لە سۆشیاڵ میدیا و کەناڵەکانی راگەیاندن و هەر شوێنێکی تردا کە زیان بە بەرژەوەندییە باڵاکانی (ی.ن.ک) بگەیەنێت.
-کار دژبە پاڵێوراوان و بەرنامەی (ی.ن.ک) لەکاتی هەڵمەتەکانی هەڵبژاردندا بکات.
-ئەرک و دەسەڵاتەکانی هاوسەرۆک ماددەی (37) یەکەم: بەرپرسیارە لە جێبەجێکردنی بڕیار و سیاسەتەکانی (ی.ن.ک).
ماددەی 70 ئەندامانی ئەنجومەنی سەرکردایەتی و ئەنجومەنی باڵای سیاسی و کادیرانی پێشکەوتوو نابێت دەسەڵاتی حزبی بۆ هیچ چالاکییەکی بازرگانی و ئابووریی بەشێوەی تاک یا هاوبەش بۆخۆیان یان کەسی نزیکیان بەکاربهێنن.
ئەوەش لەکاتێکدایە ئەمڕۆ هەینی مەکتەبی سیاسی یەکێتی بڕیاری دەرکردنی لاھور جەنگی بورهان و چوار سەرکردایەتی پەسەندکرد و بەكۆی دەنگ بڕیارەكانی بافڵ تاڵەبانی پەسەند كران.