لە هەڵەبجە لەبری حكومەت خێرخوازان سەنتەرێكی ئۆتیزم دەكەنەوە

پۆڵەتیك پرێس

لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress

لەسەر ئەركی خێرخوازان لە پارێزگای هەڵەبجە سەنتەرێكی ئۆتیزم و سەنتەرێكی تایبەت بە منداڵانی خاوەن پێداویستی تایبەت دروستدەكرێن، كە بڕیارە لە ماوەی ساڵ و نیوێكدا هەردوو پرۆژەكە تەواوبكرێن.

كوێستان محەمەد، وەزیری كار و كاروباری كۆمەڵایەتی حكومەتی هەرێم لە كۆنگرەیەكی رۆژنامەنووسیدا لە پارێزگای هەڵەبجە رایگەیاند:لەسەر رووبەری سێ‌ هەزار مەتر دووجا سەنتەری ئۆتیزم و سەنتەری راهێنانی منداڵانی خاوەن پێداویستی تایبەت دروستدەكرێت دوو هەزار مەتری بینایە، كە بە شێوەیەكی پێشكەوتوو هەموو پێداویستییەكی تێدایە ، بە راوێژ لەگەڵ ئەو لایەنانەی كە پسپۆڕن لەم بوارەدا نەخشەكە ئامادەكراوە.

وەزیری كار و كاروباری كۆمەڵایەتی وتی: تێچووی پرۆژەكە دوو ملیۆن دۆلارە، لەلایەن كۆمپانیای باڵامبۆ ، لەسەر ئەركی هاووڵاتی شێخ عەلی شێخ عزەدین ئەنجام دەدرێت، بڕیارە لە ماوەی ساڵ و نیوێكدا پرۆژەكە تەواوبكرێت.

لە دوای بەپارێزگابوونی هەڵەبجەوە حكومەتی هەرێم كەمترین بڕە پارەی بۆ پرۆژەخزمەتگوزارییەكان یان تەواوكردنی پرۆژە تەواونەكراوەكان تەرخانكردووە، ئەوەی ئەنجام دەدرێت لەلایەن خێرخوازان یان رێكخراوە بیانییەكانەوە بووە.