كۆمسیۆن: هەڵبژاردن لە كاتی دیاریكراوی خۆیدا ئەنجامدەدرێت

پۆڵەتیک پرێس

لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress

كۆمسیۆنی باڵای سەربەخۆی هەڵبژاردنەكانی عێراق دوایین ئامادەكاریی خۆی بۆ هەڵبژاردنی ئەنجومەنی پارێزگاكانی عێراق بڵاوكردەوە و رایگەیاند: هەڵبژاردن لە كاتی دیاریكراوی خۆیدا ئەنجامدەدرێت.

حەسەن سەلمان، راوێژكاری یاسایی لە راگەیاندنی كۆمسیۆنی باڵای سەربەخۆی هەڵبژاردنەكان لە عێراق رایگەیاند: دوای وەرگرتنی لیستی كاندیدەكان، وردبینی لە لیستەكاندا دەكرێت و كۆمسیۆن بەمەبەستی هەڵسەنگاندن گفتوگۆ لەگەڵ لایەنە پەیوەندیدارەكانی وەك وەزارەتەكانی خوێندنی باڵا، پەروەردە، ناوخۆ و بەرگری دەكات، بەتایبەتی ئەگەر كەسی كاندیدكراو كارمەندی وەزارەتی ناوخۆ یان بەرگری بێت.

حەسەن سەلمان راشیگەیاند: دوای ئەو رێكارانە ناوەكان رەوانەی دەستەی لێپرسینەوە و دادپەروەری دەكرێن، دواتر ناوی كاندیدەكان پێداچوونەوەیان پێدا دەكرێت و ئاڕاستەی ئەنجومەنی كۆمسیاران دەكرێن، دواتریش بەمەبەستی بەدەستهێنانی ژمارە بۆ هەر كاندیدێك تیروپشك بۆ ناوەكان دەكرێت.

لەبارەی ئەگەری دواخستنی هەڵبژاردنیش بۆ كاتێكی تر، راوێژكارەكەی كۆمسیۆنی هەڵبژاردنەكان وتی: بابەتی دواخستنی هەڵبژاردن بۆ كاتێكی تر، لە دەسەڵاتی كۆمسیۆندا نییە، بەڵكو كۆمسیۆن تەنها سەرپەرشتی پڕۆسەی هەڵبژاردنەكە دەكات لە رووی هونەرییەوە و ئەوەشی روونە تا ئێستا بڕیار وایە هەڵبژاردن لە كاتی خۆیدا بكرێت و ئێمەش لە ئامادەكارییەكانمان بەردەوامبن.

جێگای ئاماژە بۆكردنە، بڕیارە لە 18ی كانونی یەكەمی ئەمساڵ هەڵبژاردنی ئەنجومەنی پارێزگاكانی عیراق، جگە لە شارەكانی هەرێمی كوردستان، ئەنجامبدرێت.