وەزیری پێشمەرگەی هەرێم داوایەك لە فەرماندەی لیواكان دەكات

پۆڵەتیك پرێس

لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress 

وەزیری پێشمەرگەی هەرێم داوا لە فەرماندەی لیواكان دەكات هه‌میشه‌ سازو ئاماده‌بن و پێشمه‌رگه‌ی خاك و نیشتمان بن، به‌ر له‌هه‌ر شتێك.

بەگوێرەی راگەیەندراوێكی وەزارەتی پێشمەرگەی هەرێم، ئەمڕۆ دووشەممە 16ی ئابی 2021، شۆڕش ئیسماعیل وەزیری پێشمەرگەی هەرێم له‌گه‌ڵ فه‌رمانده‌ و جێگرانی سه‌رجه‌م لیواكانی وه‌زاره‌تی پێشمه‌رگه‌ كۆبۆوه ‌و تیایدا ستایشی رۆڵی لیواكان و هێزی پێشمه‌رگه‌ی كرد له‌پاراستن و به‌رگریكردن له‌خاكی كوردستان”.

لەبەشێكی كۆبونەوەكەدا جەختكرایەوە، زیاتر پابه‌ندبن به‌ دیسپلینه‌ سه‌ربازییه‌كان و به‌جێگه‌یاندنی ئه‌ركیان و جه‌ختكردنه‌وه‌ له‌سه‌ر تاك به‌تاكی پێشمه‌رگه‌كان كه‌ باشتر پابه‌ندی ده‌وام و ئه‌ركیان بن. وتیشی: به‌وردی كاربكه‌ن له‌سه‌ر به‌رزكردنه‌وه‌ی ئاستی هۆشیاری نیشتمانی پێشمه‌رگه‌ و میتۆده‌كانی پاراستنی ئاسایشی نه‌ته‌وه‌یمان.

هەر ەوكۆبونەوەیەدا شۆڕش ئیسماعیل داوایكرد، فه‌رمانده‌ی لیواكان ستراتیژیه‌تی سه‌نگه‌ره‌كانی به‌رگری دابڕێژن و به‌رده‌وام چاوكراوه‌و ساز و ئاماده‌بن، هۆشداریدا له‌سه‌ر مه‌ترسییه‌كانی تیرۆریستان و وتی “دۆخی ئێستای ناوچه‌كه‌ و جموجۆڵه‌كانی ئه‌م دواییه‌ی داعش ده‌خوازێت ریزه‌كانتان پته‌وتر بكه‌ن و كه‌موكوڕیه‌كانتان پڕبكه‌نه‌وه‌ و هێزه‌كانتان پابه‌ندی زیاتری مه‌شق و راهێنانه‌ سه‌ربازییه‌كان بن”.

له‌كۆتایی كۆبونه‌وه‌كه‌دا، ته‌واوی فه‌رمانده‌ی لیواكان پابه‌ندی خۆیان و هێزه‌كانیان بۆ بڕیارو راسپارده‌كانی وه‌زاره‌ت دووپاتكرده‌وه‌و سه‌رنج و پێشنیاره‌كانی خۆیان له‌سه‌ر پێداویستی و كه‌م و كوڕیه‌كان خسته‌ڕوو، له‌لایه‌ن وه‌زیری پێشمه‌رگه‌و ستافی وه‌زاره‌ته‌وه‌ به‌ڵێنی چاره‌سه‌ركردنی كێشه‌كان و پڕكردنه‌وه‌ی پێداویستیه‌كانیان پێدرا.