لە نێوان هەولێر و سلێمانیدا

‎دوو وێنەی جیا لە نێوان هەولێر و سلێمانی بوونی هەیە و واقعیشە، دوێنێ لەم شارەدا خۆپیشاندان بوو؛ چەقی بریاری سیاسییە سەبارەت بەم دۆخە هەولێرە نەك سلێمانی بەڵام لەوێ دەنگ نییە.

‎ئەمڕۆ لە هەولێر گردبوونەوەی وەرزشكاران بوو كە تێكڕ بەشداربوون لە چالاكی ماراسۆندا، پەیامەكە روونە لەو شارەداهیچ ناگوزەرێت و ژیان ئاساییە مووچە هەبێ و نەبێت نەدەوام دەوەستێت نە خەڵك و هێزە ئەمنییەكان بەیەكدا دەدەن.

لەوێ هیچ ناگوزەرێت لە كاتێكدا ئێمە هەموومان لەناو یەك كەشتیداین؛ ئەگەر لە سلێمانی نقووم بوو ئەوا وەك كەشتییەكەی تایتانیك لوتەكەی لەناو زەریان لێرەوە دەچەقێ و پاشان هەولێریش بەخۆیەوە راپێچ ئەكات.

ئێمە هەموومان لەبەردەم قۆناغێكی سەختداین سیاسەتی رابردووی فرۆشتنی نەوت و رێكنەكەوتن لە گەڵ بەغداد ئەم دۆخە دژاوەری بۆ خەڵك دروست كردووە، كە ئیتر كاتییەتی لایەنی كەم لەم قۆناغەدا بەرنامەی چاكسازی وەك فریاد رەسی دۆخەكە سەیر بكرێت و گرفتی مووچە خۆرانیش چارەبكرێت و لەگەڵ بەغداد بگەنە رێككەوتن.

‎لەهەولێر هەموو كەس
‎شیكەرەوەی سیاسی نییە
لە تۆڕە كۆمەڵایەتییەكان ڤیدیۆیەك بڵاوبۆتەوە كە پەیامنێرێك داوا لە خەڵك دەكات كە لێدوان بدەن لە بارەی خۆپیشاندان و ئایندەی خۆپیشاندانەكان، لەهەموو ئەو دیدارانەدا هیچ كەس ئامادەنەبووە كە لێدوان بدات لە كاتێكدا هەمان گرفتی مووچەخۆران و نەدانی مووچە لەنێوان فەرمانبەرێكی هەولێر و سلێمانی وەك یەكەو هەردووكیان یەك خەمی هاوبەشیان هەیە، لەهەولێر خەڵك گرفتی هەیە بەڵام نیزامی سیاسی بەئەندازەی بیركردنەوەی خۆی سنوری بۆ بیركردنەوەكانی خەڵك و كۆمەڵ و رایگشتی داناوە، كە قبوڵی نییە خەڵك لەو سنورە لابەن.

خەڵك لە هەولێر ئەوە نەبێت نەیەوێت قسەبكات و ژانەكانی خۆی نەخاتە روو، بەڵكو لەوە تێگەیشتووە كە باشترین دیفاكتۆ گەڕانەوەیە بۆ ئەو پەندەی كە دەڵێت:” دەست بەكڵاوەكەی خۆتەوە بگرە با بانەیبات” ئەوان ئەو رێگەیان پێباشترە لەو بگرەوبەردەیەی سلێمانی، لایەنی كەم تووشی چەرمەسەری نابن و ژیانیان لێ تێك ناچێت.ئەگەر دیقەتبەیت لە هەموو زیندانەكانی زۆنی سەوز دا یەك گرتووی سیاسی نییە، بەڵام بە پێچەوانەوە لە زۆنی زەرد لەسەر كۆمێنت خەڵك راپێچكراوەو ئێستا زیندانە، خەڵك ئەوە نابینێت كە هەولێر سڕكراوە و خەڵك لەناو مێشكی خۆیان بۆ دیواریش قسە ناكەن؛ چونكە متمانەیان بە گوێی دیوارەكە نییە.

ئەنجام ژیان لەوێ پەكی نەكەوتووە و بەشێوازی خۆی بەردەوامە و خەڵكیش راهاتوون و تاڕادەیەك ڕازین.

‎لە سلێمانی ئازادی هەیە و فەوزاش!
‎لێرە سیاسییەكان بەر لەهەمووكەس سوار سەری شەپۆلی توڕەی خەڵك بوون، خەڵك لەم شارەدا بە پرۆسەسی مێژووی دوورمەودا بە سیاسی كراوە هەموو خەڵك سیاسین، بەشێك لەوە پەیوەستە بە ئاستی تێگەیشتن لەكۆمەڵ و بەشەكەی تریش بە شێوازی سیاسی بە ئامانج گیراون.

‎ئەم شارە خەریكە دەبێتە مەیدانێكی مەترسیدار بۆ خۆنمایشكردنی رەوتی پۆپۆلیستی و نانەوەی فەوزا، لەم شارەدا پێچەوانەی دیدارە بڵاو كراوەكەی هەولێر كە هیچ كەس ئامادەی ئەوەی نەبوو قسە لەسەر خۆپیشاندان و رەخنە لە دەسەڵات بگرێت، لێرە مایك بخەیتە بەردەم هەركەسێك لە كاسب و دەستگێڕ تا مامۆستایەكی زانكۆ و پزیشك و هەمووچینەكان… وەك گەورە سیاسییەك و بیرمەندێك قسە ئەكەن و شرۆڤەی دۆخەئەكەن، تەنانەت لە سۆشیال میدیا لە سلێمانی خەڵك لە ماوەی رابردوو دا زیاتری لە خەڵكی واشنتۆن، خەریكی دەرئەنجامی هەڵبژاردنەكانی ئەمریكابوون! ترمپیان لابردوو بایدنیان دانا.

‎ئەوەی لە سلێمانی دەگوزەرێت بەشێكی ئازادییە و مومارەسەكردنی دیموكراتییە، ئەوەی تری فەوزایە و رەوتێكی پۆپۆلیست كار لە سەرە ئاناشیزمی سیاسی دەكەن و روونە دەیانەوێ ئاراستەی كێشمەكێشەكان زیاد بكەن كەشتییەكە لێرەوە نقووم بكەن و خەڵك بۆ مەرامی خۆیان بەكاربهێنن.

بەڵام ئەوەی لێرە دەگوزەرێت هەرگیز لە هەولێر ناگوزەرێت. مامۆستایان بە شیعار داوای حەقی خۆیان دەكەن، كەچی هەندێ لە پەرلەمانتارەكان دەست لە دەهۆڵ كوتینی ناو پەرلەمان بەرئەدەن و لە هەولێرەوە سوار سەری شەپۆلی توڕەیی خەڵك ئەبن و وانیشانی ئەدەن كە وەك دەمیرتاش رووبەڕووی فاشیتەكان دەبنەوە، ئەوەی لە هەردوولا بەدی دەكرێت پۆلیس و ئاسایش و خەڵكی مەدەنی هەموو براو كەس و خزمی یەكترن، هەڵگری یەك خەمن، وەك یەكیش بێ موچەن، ئاسان نییە شیرازەی كۆمەڵگە لەمە خراپتربێت؛

لە 17 شوبات كە گۆڕان ئاراستەی خۆپیشاندانەكانی دەكرد بە ئاشكرا خۆپیشاندەرانی كردە گروپێكی ئاژاوەچی!بەیانی لەسەر دەركردن.

لەم زۆنە ئازادی هەیە بەڵام زۆرتر لەوە، فەوزاهەیە و چاویان لەبەكارهێنانی توڕەی خەڵكە بۆ گەیشتن بەدەسەڵات.

ڕێبین عومەر

پەخشی راستەوخۆی رادیۆ پۆلەتیک