پۆڵەتیک پرێس
لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress
پارێزگاری سلێمانی دەڵێت: ئەوەی گرنگە بۆ ئێستا؛ هەڵبژاردنە، ئەوەی بۆ هەڵبژاردن گرنگە بێگەردییە، قبوڵکردنی ئەنجامی بێگەردە، قبوڵکردنی یەکترییە، دەستاودەستی ئاشتییانەو دەوڵەتدارییە لەسەر بنەمای هاووڵاتیبوون.
داواش دەکات ئەم جەژنی نەورۆزو ڕۆژووە بکەنە دەرفەتێکی زێڕین بۆ بەهێزکردنی گیانی یەکترقبوڵکردن، لە ڕابردودا هاوارماندەکرد ناکۆکییەکانتان تێبپەڕێنن، نەتانبیست، ئێستا داواکارین ناکۆکییەکانتان دوابخەن بۆ ئەوەی جێیەک بمێنێت لەسەری دانیشن، دواتر لە شکست و پەناهەندەیدا؛ گەورەو بچوک دەبنە ئاوارە، ئاوارەیش سەروخواری تێدا نییە.
دەقی پەیامەکە:
نەورۆزتان پیرۆزبێت، بۆ ئەوەی پیرۆزیی نەورۆزو ناوەڕۆک و ماک و مۆرک و تێمەو تەون و تانوپۆو تۆن و هێماو سەروەریی و جوامێریی و ئەنجام و ئامانجەکەی، وەک ئەوەی هەیە بمێنێتەوە، نەک وەک ئەوەی هەر کەسمان چۆنمان پێخۆشە؛ ببێت.
هەڵبژاردن؛ باشترینی خراپەکانە، بەمەرجێک ئازادیی و بێگەردیی و تیواریی و ڕاستیی و دەرفەتی یەکسان و دەستوەرنەدان و دادپەروەریی و خواستی خزمەت نەک دەسکەوت و وردیی و بابەتیبوون و مکوڕبوون و بەرپرسیارێتیی و لەگەڵیەکهەڵکردن و یەکترتەواوکردنی؛ تێدابێت.
ململانێی ئەمجارەی کورد لە هەڵبژاردنەکانی هەرێمی کوردستاندا؛ بەشێکی بچوکی لەسەر دەستورە، لەسەر یاسایە، لە سەر دامەزراوە دەوڵەتییەکانە، لەسەر بڕیارەکانی دادگای ئیتحادییە، لەسەر خەڵکە، لەسەر خاکە، لەسەر ژیان و بژێویی و موچەو بوجەیە، لەسەر خزمەتگوزاریی و سەرمایەگوزاریی و بازاڕو داهاتی گشتییە، شێرەبەشەکەی لەسەر پاراستنی جوگرافیاو هاوسەنگیی هێزو داهات و هەژمونی دەسەڵاتداریی ناوخۆیی و ناوچەییە، بۆ ئەمەش کێشەکە لەسەر ئەوە نییە چەند کەس دەنگدەدات و چەند خۆی دەپاڵێوێت، بەڵکو لەسەر ئەوەیە کام کێ لە کوێ چۆن چەند دەهێنێت، نەک کام کێ لە کوێ چۆن چەند دەنگیان داوەتێ، واتە شەڕە لەسەر ئەوەی سیستمی بژاردن و تۆمارکردن و ڕاستاندن و ڕاگەیاندنەکەی لای کێ و لە کوێ دەبێت.
لە یەکەمین هەڵبژاردنەکانەوە لە ١٩ ی ئایاری ١٩٩٢ەوە کە دەبوو ١٧ی ئایار بێت و لەبەر ساختەکردن لە مەرەکەبەکەدا دواخرا، تا بە ئێستا دەگات، هیچ هەڵبژاردنێک وەک پێویست بێگەردانە؛ بەڕێوەنەچووە.
لە هیچیاندا دەنگەکانی خەڵک نەبوونەتە خەڵک بۆ دەنگەکان.
ئەوەی گرنگە بۆ ئێستا؛ هەڵبژاردنە، ئەوەی بۆ هەڵبژاردن گرنگە بێگەردییە، قبوڵکردنی ئەنجامی بێگەردە، قبوڵکردنی یەکترییە، دەستاودەستی ئاشتییانەو دەوڵەتدارییە لەسەر بنەمای هاووڵاتیبوون.
هیچ لایەک نازانێت لە هەڵبژاردنێکی وادا؛ چەند دەهێنێت، بەڵام هەموو لاکان دەزانن هیچیان زۆرینەی سادە ناهێنن، کەواتە دەبێت لە ئێستاوە هەوڵبدەن لەگەڵ یەکتر بگونجێن و یەکتر قبوڵبکەن، ئەگەر نا کە هەڵبژاردنیش تەواوبوو؛ ناتوانن بەیەکەوە هەڵبکەن وەک ئەوەی سی و سێ ساڵە دەیبینین.
بۆیە؛ داواکارم ئەم جەژنی نەورۆزو ڕۆژووە بکەنە دەرفەتێکی زێڕین بۆ بەهێزکردنی گیانی یەکترقبوڵکردن، لە ڕابردودا هاوارماندەکرد ناکۆکییەکانتان تێبپەڕێنن، نەتانبیست، ئێستا داواکارین ناکۆکییەکانتان دوابخەن بۆ ئەوەی جێیەک بمێنێت لەسەری دانیشن، دواتر لە شکست و پەناهەندەیدا؛ گەورەو بچوک دەبنە ئاوارە، ئاوارەیش سەروخواری تێدا نییە.
پێکەوە؛ ئاگری نەورۆز بکەنەوە، بە ئاگری ناکۆکیی نەورۆز؛ مەسوتێنن.
کورد دەڵێت؛ بزن، بۆ شەوێک (ئەگەر بەفریش باریبێت، بستێک خاک دیارنەمابێت، ئەگەر لە پەلی ئەستێرە بخوات)؛ جێی خۆی خۆشدەکات، زیاد لە سەد ساڵە ژێرمان گڕە، سی و سێ ساڵە ژێرمان تەڕە، نەسوتان؟ تەڕنەبوون؟ بەسنییە؟!؟.
تێکەڵی ململانێ ناوچەیی و نێودەوڵەتییەکان مەبن، دەستی یەکبگرن؛ نەک دەستی دوژمن..
قەیوان گروپ
مایۆرکا سیتی جوانییەک لە دڵی سروشتدا
