پۆڵەتیك پرێس
لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress
سەرۆككۆماری عێراق بەجیا لەگەڵ راوێژكاری ئاسایشی نەتەوەیی و وەزیری كۆچ و كۆچبەران كۆبووەوە و جەختیكردەوە لەوەی پێویستە بە زووترین كات كۆتایی بە دۆسیەی ئاوارەكان بهێندرێت.
دكتۆر لەتیف رەشید سەرۆككۆماری عێراق لە كۆشكی بەغداد پێشوازیكرد لە ئیڤان فایەق وەزیری كۆچ و كۆچبەران و لە دیدارەكەدا گفتوگۆ لەبارەی دۆسێی ئاوارەكانی عێراق كرا و سەرۆك كۆمار جەختی لەوەكردەوە پێویستە بەزووترین كات كۆتایی بەو دۆسییە مرۆییە بهێنرێت بە زامنكردنی گەڕانەوەی هەموو ئەو ئاوارانەی كە هێشتا لە دۆخێكی سەختدا دەژین لە كەمپەكاندا.
وەزیری كۆچ و كۆچبەرانیش سوپاسی گرنگیدانی سەرۆك كۆماری كرد بە دۆسیەی ئاوارەكان و هەروەها روونكردنەوەیەكی لەبارەی كارەكانی وەزارەتەوە پێشكەشكرد، سەبارەت بە چارەسەركردنی دۆسیەی ئاوارەكان و گەڕانەوەیان بۆ ماڵ و زێدی خۆیان.
هاوكات هەر ئەمڕۆ، سەرۆككۆمار پێشوازیكرد لە قاسم ئەعرەجی راوێژكاری ئاسایشی نەتەوەیی و تاوتوێی پێشهاتە سیاسی و ئەمنییەكان و پێویستی چڕكردنەوەی هەوڵەكان بۆ بەهێزكردنی ئاسایش لە ناوچە سنوورییەكاندا كرا، لەگەڵ چارەسەركردنی دۆسێی گەڕانەوەی ئاوارەكان بۆ ناوچەكانیان، بەتایبەتی ئەوانەی لە شاری شەنگال ئاوارە بوون.