چەند ناوێک بۆ پۆستی سێ سەرۆکایەتییەکە پێشنیازدەکرێن

پۆڵەتیک پرێس:

لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress

بەشێک لەلایەنە سیاسییەکانی عێراق چەند ناوێکیان ئاشکراکرد کە پێشنیازکراون بۆ پۆستی سێ سەرۆکایەتییەکەی عێراق و بەتایبەتیش سەرۆکی پەرلەمان و سەرۆک وەزیرانی عێراق.

لەوبارەیەوە محەمەد سەعدون، ئەندامی هاوپەیمانی دەوڵەتی یاسا رایگەیاند، “لەناو ڕیزەکانی چوارچێوەی هەماهەنگی سووربوونێک هەیە لەسەر ئەوەی ماوەی سەرۆکایەتی سێ سەرۆکایەتییەکەی عێراق نوێ نەکرێتەوە و کەسی نوێ بهێنرێتە جێی ئەوانەی پێشوو”.

لەلایەکی دیکەوە عەبدولوەهاب بەیلاوی، ئەندامی هاوپەیمانی عەزم جەختی لەوەکردەوە، “هاوپەیمانی عەزم ناوی چەند کەسێکی پێشنیاز کردووە، ئەوانیش (مەحمود مەشهەدانی، سابت عەباسی و خالد عوبێدی) تا یەکێکیان پۆستی سەرۆکی پەرلەمان وەربگرن”.

لەبارەی پۆستی سەرۆک وەزیرانیشەوە حسێن عامری، کاندیدی براوەی بزوتنەوەی ماف دەڵێت: کۆبوونەوەی نێوان چوارچێوەی هەماهەنگی و رەوتی سەدر ئەرێنی بووە، بەڵام تا ئێستا کەس بەتەواوەتی بۆ پۆستی سەرۆک وەزیران دیارینەکراوە، هەرچەندە چەند ناوێک بۆ ئەو پۆستە پێشنیازکراون کە ئەوانیش: ئەسعەد عیدانی و عەلی شکری و حەیدەر عەبادین.

هەر لەوبارەیەوە پێشتر ڕێزان شێخ دلێر، راوێژکاری مەکتەبی سیاسی یەکێتی نیشتیمانی کوردستان رایگەیاند، “کاندیدی ئێمە بەرهەم ساڵح، سەرۆک کۆماری ئێستای عێراقە”.