پۆڵەتیك پرێس
لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress
نێچیرڤان بارزانی سەرۆكی هەرێم پەیامێكی لەسەر رەوشی سیاسی عێراق بڵاوكردەوە و رایگەیاند: بەوپەڕی پەرۆشی و نیگەرانییەوە لە پێشهاتە سیاسییەكانی عێراق دەڕوانین كە تا دێت بە ئاراستەی پەرتەوازەیی و قووڵتربوونەوەی زیاتری قەیرانەكان و دووركەوتنەوەی ئاسۆی چارەسەردا دەڕۆن.
سەرۆكی هەرێم لە پەیامەكەیدا رایگەیاند: بەوپەڕی پەرۆشی و نیگەرانییەوە لە پێشهاتە سیاسییەكانی عێراق دەڕوانین كە تا دێت بە ئاراستەی پەرتەوازەیی و قووڵتربوونەوەی زیاتری قەیرانەكان و دووركەوتنەوەی ئاسۆی چارەسەردا دەڕۆن. دۆخەكە وا خەریكە داهاتووی وڵات و ئاشتیی كۆمەڵایەتی دەخاتە مەترسییەكی جیدییەوە و كۆی پرۆسەی سیاسی و حوكمڕانی و دامەزراوەكان پەكدەخات.
ئەوەشهاتووە خۆپێشاندانی مەدەنیی ئاشتیانە، مافێكی رەوا و دەستووریی پارێزراوە، بەڵام پەكخستنی دامەزراوەی دادوەری دۆخەكە ئاڵۆزتر دەكات، بۆیە داوا لە هەموو لایەنەكان و لە خۆپێشاندەران دەكەین دامەزراوەكان و ئاشتیی كۆمەڵایەتی بپارێزن و لە رەوتی ئاشتییانە و مەدەنی دوورنەكەونەوە. وڵات چیتر بەرگەی ئەم هەموو قەیرانە سەخت و بارگرژییە ناگرێت و درێژەكێشانی زیاتری ئاڵۆزی، دواجار بە زیانی تەواوی گەلی عێراق تەواو دەبێت.
نێچیرڤان بارزانی راشیگەیاند: ئێمە لە هەرێمی كوردستان جارێكی دیكە جەخت لەوە دەكەینەوە كە وەك هەمیشە بەشێكین لە چارەسەر و هەموو هاوكارییەك دەكەین بۆ لێكگەیشتن و پێكهاتنی لایەنە عێراقییەكان. وڵات پێویستی بە گفتوگۆیەكی جیددیی نیشتمانی و بەرپرسیارانەی لایەنە سیاسییەكانە بۆ دۆزینەوەی چارەسەر لەسەر بنەمای دەستوور، هەر ئەوەش تاكە رێگەی دروستە بۆ دەرچوون لە قەیران و بنبەستی سیاسی و گەیاندنی وڵات بە كەناری ئارامی.