سودانى بڕیارێکی بۆ ئەو کەسانە دەرکرد یاری بە نرخی دۆلار دەکەن

سەرۆک وەزیرانی عێراق چەند رێنماییەکی دەرکرد بۆ چارەسەرکردنی بەقاچاخبردنی دۆلار و فەرمانى دەستگیرکردنیشی بۆ ئەو کەسانە دەرکرد کە یاری بە نرخی دۆلارەوە دەکەن.

لیوا یەحیا رەسوڵ وتەبێژی فەرماندەیی گشتی هێزە چەکدارەکانی عێراق رایگەیاند، سودانی فەرمانی کردووە بۆ دەستگیرکردنی ئەو کەسانەی یاری بە نرخی دۆلارەوە دەکەن و چاودێریکردنی بازگە دەرەکییەکان و وردبینی کردنی سەرچاوەی پارە بە قاچاخبراوەکان.

وتەبێژەکەی فەرماندەی گشتی هێزە چەکدارەکان ئاماژەى بەوەشکردوە، سوودانی جەختی لەوە کردەوە، پێویستە کاری بانکی و ئاڵوگۆڕ، بە شێوەیەک ئەنجامبدرێن کە گەرەنتی ئازادی بازرگانی دراو بکات بەگوێرەی ئەو زەمینە بانکییە یاساییانەی کە ملکەچی میکانیزمی ئاڵوگۆڕی کاڵا و دارایین.

هاوکات فەرمانیشی کردوە، ئاسانکاری بۆ دابینکردنی دراوی بیانی دەکات بۆ ئەو هاوڵاتیانەی ئارەزووی گەشت و چارەسەری پزیشکی دەکەن و پێویستە رێگە لە قۆستنەوەی هەل بگیرێت.

لەماوەى  رابردوو سەرۆک وەزیرانى عێراق چەند بریارێکی نوێی راگەیاند بۆ دابەزاندنی نرخی دۆلار و ڕێکخستنى سیستەمی کڕین و فرۆشتنى دۆلار، یەکێک لەوانەش گۆڕینى پارێزگری بانکی ناوەندی عێراق بوو.