پۆڵەتیك پرێس
ئەنتۆنی بلینكن، وەزیری دەرەوەی ئەمەریكا بە سەردانێك گەیشتە ئۆكرانیا و پشتیوانی وڵاتەكەی بۆ سەروەری و یەكپارچەیی ئۆكرانیا دووپاتكردەوە.
وەزیری دەرەوەی ئەمریكا لە میانی سەردانەكەیدا، داوای كرد ئۆكرانیا هەوڵی زیاتر بدات بە مەبەستی ڕووبەڕووبوونەوەی گەندەڵی و داواشیكرد ئۆكرانیا چاكسازی بكات لە پەیوەندییەكانی لەگەڵ وڵاتانی ڕۆژئاوادا.
بلینكن لە كۆبوونەوەیدا لەگەڵ هاوتا ئۆكرانیەكەی دیمیترۆ كۆلیبادا وتی: لەبەر هۆكارێكی سادە لێرەم، ئەویش ئەوەیە بەناوی سەرۆك بایدنەوە جەخت لە پابەندبوونی ئەمەریكا بكەمەوە بە سەروەری ئۆكرانیا و یەكپارچەیی خاكەكەی و سەربەخۆییەكەی.
لای خۆیەوە وەزیری دەرەوەی ئۆكرانیا وتی: ئەمەریكا هاوپەیمانی یەكەمی ئۆكرانیایە لە بوارەكانی ئاسایش و بەرگریدا و یارمەتییەكانی ئەمەریكای لە سەرەتای هەڵگیرسانی جەنگی جوداخوازەكانەوە بەرزنرخاند.
ئەم سەردانەی بلینكن هاوكاتە لەگەڵ زیادبوونی گرژییەكانی نێوان ئۆكرانیا و ڕوسیا.
بلینکن یەکەمین بەرپرسی باڵای بەڕێوبەرایەتیەکەی سەرۆکی ئەمەریکا جۆو بایدنە سەردانی ئۆکرانیا بکات، بڕیارە لەگەڵ سەرۆکی ئۆکرانیا ڤۆلۆدیمێر زیلینسکی و بەرپرسە باڵاکانی دیکەی ئۆکرانیادا کۆدەبێتەوە و چاویشی بە چالاکەوانانی دژ بە گەندەڵی بكەوێت.