پۆڵەتیک پرێس
شاندێکی وەزارەتی کشتوکاڵ لە حکومەتی فیدڕاڵی سەردانی هەرێمی کوردستانی کرد بەمەبەستی ئاگاداربوون لە پڕۆژەکانی وەزارەتی کشتوکاڵ و سەرچاوە ئاوییەکانی هەرێم.
لەوبارەیەوە نوسینگەی راگەیاندنی وەزارەتی کشتوکاڵ و سەرچاوە ئاوییەکانی هەرێمی کوردستان لە بەیاننامەیەکدا رایگەیاند، بێگەرد تاڵەبانی، بە ئامادەیی جێگرەکەی و ژمارەیەک لە بەڕێوەبەرە گشتییەکان و بەڕێوەبەرانی پەیوەندیدار پێشوازیان لە شاندێکی وەزارەتی کشتوکاڵی حکومەتی فیدڕاڵی کردووە.
هاوکات، هەردوولا کۆبوونەوەیەکیان ئەنجامدا و تیایدا، ئاڵوگۆڕی زانیاریان لەبارەی ئەگەری کاراکردنی پڕۆژەکان و پاڵپشتیکردنیان و دابینکردنی پێداویستییەکانی ئەو پڕۆژانە کرد.
هاوکات، باسیان لە کردنەوەی دەرگای بازاڕەکانی هەرێم و پارێزگا عێراقییەکان کرد بەڕووی یەکتریدا، جگە لەوەش، تاوتوێی پلانی سەردانی شاندەکەی حکومەتی فیدڕاڵیان کرد بۆ تەواوی پارێزگاکانی هەرێم.
ئەم سەردانەی شاندی وەزارەتی کشتوکاڵی عێراق لەدوای سەردانەکەی بێگەرد تاڵەبانی، وەزیری کشتوکاڵ و سەرچاوە ئاوییەکانی هەرێم دێت کە بە ئامانجی پەرەپێدانی پەیوەندییە گشتییەکانی نێوان هەردوولا و هەماهەنگی بۆ چارەسەرکردنی کێشە کشتوکاڵییەکان بەڕێوەچوو.