پۆڵەتیک پرێس
ئاژانسی سپۆتنیکی روسی بڵاویکردەوە، هێزەکانی سوریای دیموکرات ئامادەیی خۆیان دەربڕیوە بۆ رادەستکردنی شارۆچکەی عەین عیسا لە پارێزگای رەقە لە رۆژئاوای کوردستان بە هێزەکانی رژێمی سوریا و هێزەکانی روسیا.
لەوبارەیەوە، عومەر رەحمون ئەندامی دەستەی بەرژەوەندییە نیشتیمانییەکانی سەر بە رژێمی سوریا رایگەیاند، لە کۆبوونەوەکەی ئێوارەی یەکشەممە، چەند رێککەوتنێک لەنێوان هێزەکانی سوریای دیموکرات “هەسەدە” و رژێمی سوریا ئەنجامدراوە.
رەحمون دەشڵێت: هەتا ئێستا زانیاری ورد لەبارەی خاڵەکانی رێککەوتنەکە بەردەست نییە بەڵام کوردەکان بە روسیایان وتووە، ئامادەن تەواوی عەین عیسا رادەست بکەن و لە چەند سەعاتی داهاتووشدا دەست بە جێبەجێکردنی رێککەوتنەکە دەکرێت.
هەتا ئێستا هیچ لێدوانێکی فەرمی لەلایەن هێزەکانی سوریای دیموکرات بڵاونەکراوەتەوە و هیچ هەنگاوێکی کردەییش لەلایەن ئەو هێزەوە نەنراوە بۆ کشانەوە لە میحوەرەکانی عەین عیسا.