پۆڵەتیك پرێس
بافڵ جەلال تاڵەبانی، سەرۆكی یەكێتیی نیشتمانیی كوردستان لە دەباشان پێشوازیكرد لە رۆزی كەیڤ، كونسوڵی گشتیی بەریتانیا لە هەرێمی كوردستان.
لە دیدارێكدا كە ئەمین بابەشێخ، لێپرسراوی مەكتەبی پەیوەندییەكان ئامادەبوو، دۆخی سیاسیی هەرێم و فراوانكردنی هەماهەنگییەكان لەپێناو چارەسەركردنی كێشەكان گفتوگۆی لەبارەوەكرا.
بافڵ جەلال تاڵەبانی ئاماژەی بە بەردەوامیی هەوڵە نیشتمانییەكان كرد بۆ چارەسەركردنی كێشەكان، باشتركردنی ژیانی هاوڵاتییان و رایگەیاند، هەموومان لە هەرێم یەك چارەنووسی هاوبەشمان هەیە، بۆیە پێویستە هەمووان مامەڵەیەكی دروست و بەرپرسیارانە لەگەڵ دۆخەكە بكەن و داهاتووی هەرێم و ژیانی خەڵكەكەی نەكرێتە قوربانیی بەرژەوەندییە تایبەتەكان.
لەبارەی رێكخستنەوەی پێشمەرگە و هەوڵەكان بۆ سەرخستنی ئەو پرۆسە نیشتمانییە، بافڵ جەلال تاڵەبانی وتی، یەكێتی بەرپرسانە مامەڵە لەگەڵ دۆخەكە دەكات و دەیەوێت بەزووترین كات هەموو هێزەكان لەچوارچێوەی پرۆژەیەكی نیشتمانیی دادپەروەرانەدا رێكبخرێنەوە و پارێزەری بەرژەوەندییە باڵاكان بێت.
كێشەكانی نێوان هەولێر و بەغدا و شایستەداراییەكانی هەرێم تەوەرێكیتری گفتوگۆكان بوو و لەوبارەیەوە بافڵ جەلال تاڵەبانی وتی، بەدەستهێنانی مافە یاسایی و دەستوورییەكانی هەرێم و دەستەبەركردنی ژیانێكی شایستە بۆ خەڵكەكەمان كاری لەپێشینەمانە، هەوڵەكانیشمان لەوپێناوەدا بەردەوام دەبێت.