بافڵ جەلال تاڵەبانی پشتیوانی خۆی بۆ سەرۆكی پەرلەمان و فراكسیۆنی یەكێتی دووپات دەكاتەوە

پۆڵەتیك پرێس

لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress

بافڵ جەلال تاڵەبانی، سەرۆكی یەكێتیی نیشتمانیی كوردستان و رەفعەت عەبدوڵا، بڕیاردەری دەستەی كارگێڕی و ئاسۆ مامەند، كارگێڕی مەكتەبی سیاسی و قوباد تاڵەبانی، سەرپەرشتیاری سكرتاریەتی سەرۆك مام جەلال لە دەباشان پێشوازیان لە سەرۆكی پەرلەمان و فراكسیۆنی یەكێتی لە پەرلەمانی كوردستان كرد.

‏‎بافڵ جەلال تاڵەبانی لە دەستپێكی كۆبوونەوەكەدا ستایشی رۆڵی مێژوویی و ئازایانەی فراكسیۆنی یەكێتی كرد و پشتیوانی تەواوی یەكێتی بۆ سەرۆكی پەرلەمان دووپاتكردەوە كە لە دوایین كۆبوونەوەی پەرلەمانی كوردستان پاڵپشت بە پەیڕەوی ناوخۆی پەرلەمان، رێگریان لە كارێكی یاساشكێنی كرد و ئیرادەی خەڵكیان سەرخست و رێگرییان لە شكاندنی شكۆی پەرلەمان گرت.

وتیشی، هەڵوێستی دوێنێتان بۆ سەرخستنی ئەزموونی دیموكراسیی هەرێم مایەی شانازیی یەكێتی، دڵسۆزانی گەل و دۆستانی دیموكراسی بوو كە دەیانەوێت هەڵبژاردنێكی بێگەرد لە وادەی خۆیدا بەڕێوەبچێت و یاری بە چارەنووس و دەنگی خەڵكەوە نەكرێت.

‏‎بافڵ جەلال تاڵەبانی راشیگەیاند، لەسەرەتای دروستبوونی كێشە سیاسی و یاساییەكانەوە سەبارەت بە پرسی هەڵبژاردن، یەكێتی بە ئەوپەڕی بەرپرسیارێتییەوە كاری بۆ سازان و رێككەوتنی نیشتمانی كردووە و هەنگاوی پێویست نراوە لەنێوان هەموو لایەنە سیاسییەكاندا كە یاسای هەڵبژاردن هەمووار بكرێتەوە و هاوتەریب كۆمسیۆنیش كارابكرێتەوە. دوور لە خۆسەپێنی خواستی كۆمەڵانی خەڵكی تێدا جێبەجێ بكرێت و كورسی كۆتاكان بۆ یەكلاكردنەوەی پرسە چارەنووسسازەكان بەكارنەهێرێت وەك ئەوەی دوێنێ بینیمان و بەداخەوە ئەوەی نەدەبوو رووبدات، روویدا.

‏‎لەبارەی نوێنەرایەتی پێكهاتەكان و هەڵبژاردنی چارەنووسی خۆیانەوە سەرۆكی یەكێتی نیشتمانی كوردستان وتی، ئێمە لە سەرەتاوە داوامانكردووە پێكهاتەكان نوێنەرایەتی راستەقینەی خۆیان بكەن و لە ململانێ سیاسی و حزبییەكاندا بەكارنەهێنرێن.
‏‎لەبەشێكی تری وتەكانیدا بافڵ جەلال تاڵەبانی، وێڕای هەڵوەستەكردن لە سەر دۆخی گشتیی هەرێم و عیراق بەرچاوروونیدایە پەرلەمانتارانی یەكێتی و داوایكرد، وەك هەمیشە پشتبەستوو بە یاسا لە سەنگەری بەرگری لە مافەكانی خەڵكدا بن و رێگە نەدەن دامەزراوەی شەرعی و یاساییەكان بۆ بەرژەوەندی حزبی بەكاربهێنن و شكۆی دامەزراوە نیشتمانییەكان لەكەدار بكرێت.

‏‎لەكۆبوونەوەكەدا بافڵ جەلال تاڵەبانی گەشبینی خۆشی نیشاندا كە بە پشتیوانیی دڵسۆزانی گەل و وڵات ئەم دۆخەش تێدەپەڕێنین و داوایكرد، هەموولایەك بەرپرسیارانە مامەڵە لەگەڵ ئەم قۆناغە هەستیارەدا بكەن. وتیشی، دەبێت بەدیهێنانی بەرژەوەندییە نیشتمانییەكان ئەركی لەپێشینەمان بێت.

‏‎سەرۆكی یەكێتی وتیشی، سەرباری ئەو كێشەیەی لە پەرلەمان روویدا، یەكێتی نیشتمانیی كوردستان لەسەر باوەڕە نەگۆڕەكانی خۆی سوورە و دەرگای بۆ هەموو گفتوگۆ و لێكتێگەیشتنێك كراوەیە كە ئامانج لێی چارەسەركردنی كێشەكان و بەڕێوەچوونی هەڵبژاردنێكی بێگەرد بێت لە وادەی خۆیدا.