قوباد تاڵەبانی: ناهێڵین بكوژەكان بە ئازادی و بە ئیستراحەتی بێن و بڕۆن

پۆڵەتیك پرێس

لەتێلیگرام یەکەم کەسیت هەواڵەکانت پێدەگات جۆینبە https://t.me/Politicpress

قوباد تاڵەبانی، جێگری سەرۆكی حكومەتی هەرێم لە نووسینێكدا باس لەوە دەكات ” دوابەدوای هەوڵ و كۆششی هێزە ئەمنیەكان كە بە پشتیوانی هاوڵاتیان و میدیاكارانی خەمخۆر، گومانلێكراوێك بە تاوانی كوشتن و توندو تیژی دژی ژنان دەستگیر دەكەین، بە بڕیارێكی دادگا دێینەوە سەر خاڵی سفر”.

لە نووسینێكدا كە لە پەڕەی فەرمی خۆی لە تۆڕی كۆمەڵایەتی فەیسبوك بڵاویكردەوە بە ناونیشانی “مار و پەیژە”، قوباد تاڵەبانی جێگری سەرۆكی حكومەت نووسیویەتی: ماوەیەكە لەسەر دیاردەكانی زیادبونی روداوی توندوتیژی دژی ژنان و خێزان و كوشتنیان (بە دەست ئەو پیاوانەی وا دەزانن شەرەفیان بەزێندراوە، بەڵام ئەوان هەرگیز شەرەفیان نەبووە) لەگەڵ وەزارەت و لایەنە پەیوەندیدارەكانی حكومی و ناحكومیش كۆدەبمەوە، هەموو ئەوانەی لەگەڵیان دادەنیشم قسەی باش دەكەن، بەڵام هەموشیان دەڵێن: ئەم دیاردەیە بە قسە بنبڕ ناكرێت.

هەروەها دەڵێت، زۆر توڕڕە بوم كە بیستم تۆمەتبارێك بە كوشتنی دوو كچەكەی بە هۆكارێكی لاوازو بە ناو نەبوونی بەڵگەی شایستە ئازاد كراوە. ئەمە چ پەیامێك ئەدات بەو بێ شەرەفانەی ژن دەكوژن؟ پێیان ئەڵێت: ئەگەر كچی خۆتت كوشت بڵێ من نەبوم، كورە بچووكەكەم بوو ، دوایی ئازاد ئەكرێت. تا ئەو كاتەش، كورەكەتت ناردوەتە ماڵە كۆنە جاشێك كە دور بێت لە دەستی هێزە ئەمنییەكان و دامەزراوەكانی دەوڵەت.

دەقی نووسینەكە:

مار و پەیژە

دوابەدوای هەوڵ و كۆششی هێزە ئەمنیەكان كە بە پشتیوانی هاوڵاتیان و میدیاكارانی خەمخۆر، گومانلێكراوێك بە تاوانی كوشتن و توندو تیژی دژی ژنان دەستگیر دەكەین، بە بڕیارێكی دادگا دێینەوە سەر خاڵی سفر.

ماوەیەكە لەسەر دیاردەكانی زیادبونی روداوی توندوتیژی دژی ژنان و خێزان و كوشتنیان (بە دەست ئەو پیاوانەی وا دەزانن شەرەفیان بەزێندراوە، بەڵام ئەوان هەرگیز شەرەفیان نەبووە) لەگەڵ وەزارەت و لایەنە پەیوەندیدارەكانی حكومی و ناحكومیش كۆدەبمەوە، هەموو ئەوانەی لەگەڵیان دادەنیشم قسەی باش دەكەن، بەڵام هەموشیان دەڵێن: ئەم دیاردەیە بە قسە بنبڕ ناكرێت.

كرداریش بریتیە لە یاسا، رێنمایی، ئیجرائات، بەدواداچوون، هوشداریدان و كاری دەستە جەمعی بە گشتی، ئەمانە و چەندین ئالییەتی تر پێویستە وەك یەك تیپی ئۆركێسترا كار بكەن، ئەگەر یەكێكیان رۆڵی خۆی نەگێڕێت پارچە میوزیكەكە دەشێوێت، ئەمە بۆ دەزگاكانی ‌حكومەت و لایەنە پەیوەندیدارەكانی تریش راستە، بەتایبەت لە بەرەنگاربوونەوەی دیاردەی توندوتیژی دژی ژنان و خێزان، یان دەبێت بەیەكەوە كار بكەن یان ئامانج ناپێكن. ئەگەر یەكێك لە ئەندامانی ئەم ئۆركێسترایە بە ئەركی خۆی هەڵنەستێت، یان خەمسارد بێت، فەراغێك دروست دەبێت كە شكستمان پێ دەهێنێت.

زۆر توڕڕە بوم كە بیستم تۆمەتبارێك بە كوشتنی دوو كچەكەی بە هۆكارێكی لاوازو بە ناو نەبوونی بەڵگەی شایستە ئازاد كراوە. ئەمە چ پەیامێك ئەدات بەو بێ شەرەفانەی ژن دەكوژن؟ پێیان ئەڵێت: ئەگەر كچی خۆتت كوشت بڵێ من نەبوم، كورە بچووكەكەم بوو ، دوایی ئازاد ئەكرێت. تا ئەو كاتەش، كورەكەتت ناردوەتە ماڵە كۆنە جاشێك كە دور بێت لە دەستی هێزە ئەمنییەكان و دامەزراوەكانی دەوڵەت.

بەداخم كە تاكو ئێستاش هەندێك دادوەرمان خەمساردن لەمامەڵەكردن لەگەڵ كەیسی توندوتیژی دژی ژنان. من پێتان دەڵێم: خۆ هەر رۆژێك دێت ئەو بێ شەرەفەی كە كچەكەتی كوشت، سەر دەرەكاتەوە.

روو دەكەمە بكوژەكان؛ دڵنیام خۆت وەك بە ناو باوكێك، هەموو شەوێك كە دەچیت بخەویت و دور كەوتیتەوە لە دیوەخانەكەت و دور كەوتیتەوە لەوانەی كە هانتان ئەدەن ئەم بێ شەرەفیە ئەنجام بدەن، مەجبور دەبی ئەو رۆژانەت بێتە بیر كە ئەو كچە نازدارانەت لە باوەش بوو و بە زەردەخەنەیەكیان لە خۆشیدا وات دەزانی هەموو دونیا هی خۆت بوو. دڵنیاشم دوا دیمەن كە دێتە بەرچاوت دەموچاوی خوێناوی ئەو جەرگانەت دەبێ كە لە ئەنجامی بێشەرەفی خۆتان یان كورەكانتان دەیانكوژن. ئەزانم كە تەنها دەبیت، ویژدانت پێت ئەڵیت كە؛ تۆ نە ئازایت، نە مەردیت، نە كەرامەتی خێزانی خۆتت پاراست، نە شەرەفی خێزانت پاراست (چونكە لە ئەساسدا بێ شەرەفیت)، دڵنیام خۆت بەو چاوە تەماشای خۆت دەكەیت كە خوای گەورە تەماشات دەكات، وەك بكوژێك، وەك موجرمێك، وەك بێشەرەفێك.

ئەم شەڕەی دەستمان بۆ بردوە وەك یاری مار و پەیژە وایە، كەی وا دەزانیت بە پەیژەیەك چەند هەنگاوێك سەركەوتیت، مارێك ئەتهێنێتەوە خوارێ. بەس بزانن ها، هەر بەو پەیژانەدا سەر ئەكەوینەوە، ناهێڵین بكوژەكان بە ئازادی و بە ئیستراحەتی بێن و بڕۆن، هەرگیزیش ناهێڵم خەڵك لە بیری بچێت كە چەندە بێ شەرەفن. خوا وەكیلە؛ ئەگەر بە تاقی تەنهاش بم هەر بەدواتانەوە دەبم.

قەیوان گروپ

 


مایۆرکا سیتی جوانییەک لە دڵی سروشتدا