وەزارەتی پێشمەرگەو سوپای عێراق لەواژووكردنی رێككەوتنی كۆتایی نزیكدەبنەوە

پۆڵەتیك پرێس:
وەزارەتی پێشمەرگە و سوپای عێراق لەسەر سێ خاڵ كۆكن‌و لەواژووكردنی رێككەوتنێكیش نزیكن، ئەمەش دوای ماوەیەك لەبەردەوامی گفتوگۆكانی نێوانیان.

لەو بارەوە جەبار یاوەر، ئەمینداری گشتی وەزارەتی پێشمەرگە بۆ “پۆڵەتیك پرێس” وتی: هێشتا لەگەڵ سوپای عێراق لەبارەی ناوەندەكانی هەماهەنگی لە گفتوگۆداین، بەڵام لێكتێگەیشتی باش دروستبوون و پرۆسەی هەماهەنگیش تەنیا ناوەند نییە، دامەزراندنی ناوەندی هەماهەنگی و دامەزراندنی هێڵی هاوبەشی هەماهەنگی و پرۆسەی ئەنجامدانی ئۆپراسیۆنی هاوبەشە.

جەبار یاوەر وتیشی: لە زۆربەی خاڵەكان گەیشتوینەتە لیكتێگەیشتنی باش لەنێوان فەرماندەكانی هێزی پێشمەرگە و فەرماندەی ئۆپراسیۆنە هاوبەشەكانی سوپای عێراق‌و نزیكین لەواژووكردنی كۆتایی و ڕێككەوتن لەسەر كاری ناوەندەكان و دەستكردن بەئۆپراسیۆنی هاوبەش.

هەروەها وتی: لە هیچ جێگەیەك و لە خانەقینەوە تا ڕەبیعە و بە درێژای سنوری پێنج پارێزگا ئاڵوگۆڕی جێگەی سەربازی هێزە عێراقییەكان و هێزەكانی وەزارەتی پێشمەرگە نەكراوە و هێزەكان لە جێگەی خۆیاندان و تەنیا لەكاتی پێویست و پاش ڕێككەوتن لەسەر ئۆپراسیۆنی هاوبەش، جوڵە بەهێزەكان دەكرێت لەو بۆشاییانەی دروستبوون.

دەربارەی پشك و شایستە داراییەكانی پێشمەرگە لەبودجەی گشتی عیراق، جەبار یاوەر ئەوەی خستەروو، موچە و هەموو پێویستییەكانی وەزارەتی پێشمەرگە پێشكەش بە وەزارەتی دارایی دەكرێن و وەزارەتی دارایی و ئەنجوومەنی وەزیران بەرپرسن لەسەر بودجەی گشتی عێراق شایستە و موچەی پێشمەرگە فەراهەم بكەن.

ماوەیەكە وەزارەتی پێشمەرگەو سوپای عێراق لەگفتوگۆدان، بۆ ئەوەی لەسەر چەند خاڵێك بۆ هەماهەنگیكردن رێكبكەون، كە رێككەوتنەكەشیان بۆ رووبەڕووبوونەوەی چەكدارانی داعشە لەناوچە كێشە لەسەرەكان.