بەبێ‌ بوونی كۆرۆنا لەوڵاتەكەی كیم ڤاكسینی وەرگرت

پۆڵەتیك پرێس:
بەپێی سەرچاوە هەواڵگرییەكانی ژاپۆن، چین پێكوتەیەكی ئەزموونی بۆ ڤایرۆسی كۆرۆنای نوێی لەسەر كیم جۆنگ ئون سەرۆكی كۆریای باكوورو خێزانەكەی تاقیكردووەتەوە.

هاری كازیانس، شارەزا لە كاروباری كۆریای باكوور لەسەنتەری لێكۆڵینەوەی ” ناشیوناڵ ئینتریست” لەواشنتۆن، لەزاری دوو سەرچاوەی هەواڵگری ژاپۆنییەوە، كە ناوی نەهێناون، ئاماژەی بەوە كردووە، ئەندامانی خێزانی كیم‌و ژمارەیەك لە گەورە بەرپرسانی كۆریای باكوور پێكوتەكەی چینییان پێگەیشتووە .

هاوكات بەپێی ئاژانسی رۆیتەرز، تائێستا روون نییە چ كۆمپانیایەكی چینییە، ئەو پێكوتەی بۆ خێزانەكەی كیم دابین كردووەو تا چەندێك سەلامەت‌و سەركەوتووە.

كازیانس باسی لەوەش كردووە، كیم جۆنگ ئون و ژمارەیەك لە گەورە بەرپرسانی دیكەی خێزانەكەی لە ماوەی دوو بۆ سێ هەفتەی ڕابردوودا بە ڤاكسینەكە كوتراون.

سێ‌ كۆمپانیای چینی، كە بریتین لە كۆمپانیاكانیSinovaK Biotech ” ، ” Can Seno Bayou ” و ” Sinofarm Group ” ی سەرقاڵی بەرهەمهێنانی ڤاكسینی كۆرۆنان.

ئەم هەواڵانەش بۆ كوتانی كیم‌و خێزانەكەی لەكاتێكدایە، كە پێشتر چەندین جار سەرۆكی كۆریای باكوور رایگەیاندبوو، هیچ حاڵەتێكی تووشبوون بەڤایرۆسی كۆرۆنا لەوڵاتەكەی تۆمار نەكراوە.