پۆڵەتیك پرێس:
لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress
شاندێکی باڵای وەزارەتی دارایی و ئابووری هەرێمی کوردستان بۆ بابەتی مووچە گەیشتنە بەغدا و ئەندامێکی ئەنجوومەنی نوێنەرانیش دەڵێت، “ئەگەر لیستەکەی هەرێم هیچ کێشەی تێدا نەبێت، پێش جەژن مووچەی فەرامانبەرانی هەرێم دەنێردرێت”.
وەزارەتی دارایی و ئابووری حکومەتی هەرێمی کوردستان رایگەیاند، ئێوارەی رۆژی سێشەممە (2-4-2024)، شاندێکی هەرێمی کوردستان بەسەرۆکایەتیی ئاوات جەناب نووری، وەزیری دارایی و ئابووری بەرەو شاری بەغدا بەڕێکەوتوون.
شاندەکەی هەرێم پێکهاتووە لە، ئاوات جەناب نووری، وەزیری دارایی و ئابووری هەرێم، ئومێد سەباح سەرۆکی دیوانی ئەنجومەنی وەزیران، دکتۆر ئامانج رەحیم سکرتێری ئەنجومەنی وەزیران، دکتۆر عەبدول حەکیم خەسرۆ سەرۆکی فەرمانگەی هەماهەنگی و بەدواداچون و ژمارەیەک راوێژکارو بەڕێوەبەری گشتی لە ئەنجوومەنی وەزیران و وەزارەتی دارایی و ئابووری حکومەتی هەرێم.
وەزارەتی دارایی لە راگەیەندراوەکەدا ئاماژەی بەوەکردووە، ئامانج لە سەردانەکە گفتوگۆکردنە لەگەڵ لایەنە پەیوەندیدارەکان لە حکومەتی فیدراڵی بۆ چارەسەرکردنی پرسی بودجەو مووچەی فەمانبەران و مووچەخۆرانی هەرێمی کوردستان و ناردنی مووچەی پێشمەرگە و هێزە ئەمنیەکانی هەرێمی کوردستان.
لەلایەکی دیکەوە غەریب ئەحمەد، ئەندامی ئەنجوومەنی نوێنەرانی عێراق رایگەیاندووە، لە بەغدادەوە هیچ گرفتێک بۆ ناردنی مووچەی فەرمانبەرانی هەرێمی کوردستان نییە و تا ئەوکاتەی فەرمانبەرانی هەرێمی کوردستان دەبنە خاوەنی هەژماری بانکی، وەزارەتی دارایی عێراق پارەی تەرخانکراو بۆ مووچەی فەرمانبەران دەنێرێت.
ئەو ئەندامەی ئەنجوومەنی نوێنەران باسی لەوەشكردووە، ۆ مانگی ئازار ئەگەر هیچ گرفتێک لە لیستەکدا نەبێت، وەزارەتی دارایی عێراق دوای وردبینی پێش جەژن مووچەی فەرمانبەرانی هەرێمی کوردستان دەنێرێت و دەبێت حکومەتی هەرێمی کوردستان دابەشی بکات.
لە هەرێمی کوردستاندا ملیۆنێک و 251 هەزار مووچەخۆر هەن، لەو ژمارەیە 751 هەزار 805 کەسیان فەرمانبەری سەربازی و شارستانین. مانگانە حکومەت بۆ پێدانی مووچەیان، زیاتر لە 900 ملیار دیناری پێویستە.