یەحیا رەسول: هێرشەكانی شەوی رابردوی ئەمریكا پێشێلكردنی سەروەریی عێراقن

پۆڵەتیک پرێس

لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress

یەحیا رەسول، وتەبێژی محەمەد شیاع سودانی، فەرماندەی گشتی هێزە چەكدارەكانی عێراق رایگەیاند، هێرشەكانی شەوی رابردوی ئەمریكا، پێشێلكردنی سەروەریی عێراقن.

یەحیا رەسول وتەبێژی فەرماندەی گشتی هێزە چەكدارەكانی عێراق لە راگەیەندراوێكدا بڵاویکردەوە، ئەمریكا لەڕێگەی فڕۆكەی جەنگییەوە هێرشی كردۆتە سەر شاری قائم و چەند ناوچەیەكی سنوریی عێراق، ئەو هێرشانە لەكاتێكدان كە عێراق هەمو هەوڵی خۆی خستۆتەگەڕ بۆ پاراستنی سەقامگیری ناوچەكە.

وتیشی: ئەو هێرشانە پێشێلكردنی سەروەری عێراقن و لاوازكردنی هەوڵەكانی حكومەتی عێراقن و ئەنجامەكانی مەترسیدار دەبن لەسەر ئاسایش و سەقامگیری عێراق و ناوچەكە.

لە تۆڵەی کوژرانی سێ سەربازی ئەمریکیدا، فڕۆکە جەنگییەکانی ئەمریکا لە دوایین ساتەکانی شەوی هەینی، لەنێو عێراق و سووریا هێرشیان کردە سەر پێگەی سوپای پاسدارانی ئێران و گرووپە چەکدارەکانی لایەنگری تاران.

فەرماندەیی ناوەندیی ئەمریکا (سێنتکۆم) ئاماژەی بەوە کرد، 85 ئامانجیان لەنێو عێراق و سووریا بۆردوومانکردووە کە لە لایەن فەیلەقی قودسی سوپای پاسدارانی ئێران و گرووپە چەکدارەکانی نزیک لێی، “بۆ هێرشکردنە سەر هێزەکانی ئەمریکا و هاوپەیمانیی نێودەوڵەتی” بەکارهێنراون.