پۆڵەتیک پرێس
وەزارەتی شارەوانی و گەشتوگوزار ڕایگەیاند، تیمەکانی سەرۆکایەتی شارەوانی سلێمانی دەستیان کردەوە بە هەڵمەتی چاککردنەوەی شەقامەکانی سلێمانی.
ئەمڕۆ دووشەمممە 18ی نیسان وەزارەتی شارەوانی و گەستوگوزار لە بەیاننامەیەکدا ڕایگەیاند، نۆژەنكردنەوەی شەقامەكان پرۆسەیەكی بەردەوامی سەرجەم دامودەزگەكانی شارەوانییە لە سەرتاسەری هەرێمی كوردستان، بۆ ئەوەی شەقامەكان تێك نەچن و گرفتی هاتوچۆش دروست نەبێت، وەكچۆن بایەخ بە دروستكردنی شەقامی نوێ دەدرێت، بە هەمان شێوە، پرۆسەی چاككردنەوە لەلایەن تیمەكانی شارەوانی بەڕێوە دەچێت.
ئاماژەی بەوەشدا، لەم چوارچێوەیەدا تیمەكانی سەرۆكایەتیی شارەوانیی سلێمانی، بە مەبەستی نۆژەنكردنەوەی شەقامەكانی شارەكە، لە شەقامی سەرەكی سلێمانی-عەربەت دەستیان كرد بە هەڵمەتێكی فراوانی چاككردنەوەی شەقامە ناوخۆیی و سەرەكییەكان و پرۆسەكەش لە ڕۆژانی داهاتوودا بەردەوامی دەبێت.
ڕوونیشیان کردەوە لە سەرەتای ئەمساڵەوە وەزارەتی شارەوانی و گەشتوگوزار لەسەر داهاتی شارەوانی و ئاو، زیاتر لە سێ ملیار دیناری بۆ پرۆژە هەمەجۆرەكانی سلێمانی خەرج كردووە، كە نۆژەنكردنەوەی شەقامەكان، یەكێكە لە پرۆژەكان.