خاڵە ناكۆكەكانی پرۆژە یاسای بودجە ئاشكرادەكرێن

پۆڵەتیك پرێس

لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress

پەرلەمانتارێك خاڵە ناكۆكەكان لەسەر پرۆژەیاسای بودجە ئاشكرادەكات، داواش دەكرێت بودجەیەك بۆ دروستكردنی فڕۆكەخانەیەكی نوێ لە بەغداد تەرخان بكرێت.

عەلی بەنداوی ئەندامی ئەنجومەنی نوێنەرانی عێراق رایگەیاند، بەگشتی كێشە و ناكۆكییەكی ئەوتۆ لەسەر پرۆژەیاسای بودجە نییە و پێشبینی دەكرێت بە زوترین كات تێبپەڕێنرێت، بەڵام تەنها خاڵی ناكۆك ئەوەیە كە پەرلەمانتاران یەك خاڵی ناكۆكیان هەیە و بەسەر دوو بەرەدا دابەش بوون، بەشێكیان داوا دەكەن پرۆژەیاساكە كە بۆ ساڵەكانی 2023 و 2024 و 2025ە، بەیەك پاكێج دەنگی لەسەر بدرێت، بەشێكی تریشیان داوا دەكەن بودجەی هەر یەكێك لەو سێ ساڵە بە جیا گفتوگۆی لەسەر بكرێت و دەنگی لەسەر بدرێت.

بەپێی بەڵگەیەكیش كە میدیاكانی عێراق بڵاویانكردووەتەوە، حەسەنەین قاسم خەفاجی، سەرۆكی لیژنەی وەبەرهێنان و گەشەپێدان لە ئەنجومەنی نوێنەرانی عێراق، داوای لە لیژنەی دارایی كردووە بڕگەیەك بۆ پرۆژەیاسای بودجە زیاد بكرێت كە تایبەت بێت بە تەرخانكردنی بودجەیەكی تایبەت بە دروستكردنی فڕۆكەخانەیەكی نوێی نێودەوڵەتی لە بەغداد.