پۆڵەتیک پرێس:
دوو بومەلەرزەی دیکە لە باکووری کوردستان ڕوویاندا
لە هەردوو پارێزگای ئامەد و مەرەشی باکووری کوردستان دوو بومەلەرزەی دیکە بە گوڕی 4 و 4.1 پلەی ڕێختەر ڕوویاندا.
لەوبارەیەوە سەرۆکایەتی کارەساتی لەناکاو و فریاگوزاری تورکیا ئاماژەی بەوەکرد، کاتژمێر 6:04 خولەکی بەرەبەیانی ئەمڕۆ چوارشەممە بومەلەرزەیەک بە گوڕی 4 پلەی ڕێختەر لە شارۆچکەی دیجلەی سەربە پارێزگای ئامەد تۆمارکراوە.
وتیشی، بومەلەرزەکە بە دووری 67 کیلۆمەتر لە ناوەندی شاری ئامەد و بەقوڵایی حەوت کیلۆمەتر ڕوویداوە.
ئەوەشی خستەڕوو، دواتر لە کاتژمێر 7:40 خولەک بومەلەرزەیەکی دیکە بە گوڕی 4.1 پلەی ڕێختەر لە پارێزگای مەرەشی باکووری کوردستان ڕوویداوە.
لەدوای بومەلەرزە وێرانکەرەکەی 6ی ئەم مانگەوە، هەزاران پاشلەرزەی دیکە لە ناوچە جیاجیاکانی باکوور و ڕۆژئاوای کوردستان و تورکیا و سوریا تۆمارکراون.