ماوەی داهاتوو رەدو بەدەلی زۆر دروست دەبێت لەسەر ئایندە و شێوازی حكومەتی لۆكاڵی كەركوك، لەسەر بەشی لایەنەكان و پێكهاتەكان، لەسەر جەنەڕاڵ پۆست كە پۆستی پارێزگارە.
لەپەنا ئەم تەداروكانەی كوڕی ئیستحقاقی هەڵبژادن و كچی سازان و زادەی گفتوگۆی لایەنەكانن، شتی تریش هەن و دەقەومێن، شتی تر كە كاریان بەلاڕێدا بردن و كاردانان و تاقیكردنەوەی ئیرادەن. لەوانە گێچەڵە ناڕەواكەی سوپا دژی خەڵكی گەڕەكی نەورۆز. لەوانەشە كەینوبەینی تریش مابن كە ساحیرەكان لە چەكمەجە دایاننابێت و پەیتا پەیتا لەبەردەم دیموكراتی و ئیرادەی دەنگدەر قیتی دەكەنەوە.
گرنگە كورد و بەتایبەتیش یەكێتی كە بە كردار دۆسێكەی بەدەستەوەیە، هەم بە گفتوگۆ و تەگبیری كراوەی سیاسی و هەمیش بە (عەزمی بەتینی) نیشتمانی و نەتەوەیی لەگەڵ پێشهاتەكان مامەڵە بكات.
وەك لە ئەدەبیاتی جارانی حزبەكەماندا هاتووە (نە لەباری ببەین، نە مرادری بكەینەوە).
یەكێتی حزبی كۆمەڵانی خەڵكە و لەوانەوە هەڵقوڵاوە و دەشزانێت دەنگی دیموكراتی خەڵك ئەمانەتە و سیاسەتی چەپكە گوڵەكە و پڕەنسیبی (نەشتەرگەری مێشك)یش كە هی سەرۆك مام جەلالە، ئەمانەش ئەمانەتی سەربارن، یەكێتی بەم كۆكتێلە گیراوەوە دەتوانێت ئەرخەیان بێت كە لەسەر رێگە ڕاستەكەیە. جا لەم رێگایەشدا ئاساییە، هەر قۆرت و رێگری دێن و دەڕۆن. ئەمانە هیچ نین، (یاری تلیماج)ی پێش كلاسیكۆ مەزنەكەی پێكهاتنی حكومەتی داهاتووی كەركوكن.
سەرۆكی یەكێتی هەڤاڵ بافڵ لە سەكۆی كەركوكەوە رایگەیاند: (دەنگ لە ئێوە و شەڕی مافەكان بۆ ئێمە جێبێڵن)، پەیامەكە زۆر روون و ئاشكرابوو، كاتێتی.
مەسەلە گەڕەكی نەورۆز نییە، مەسەلە ئاهەنگی نەورۆزە كە لەگەڵ جاڕدانی ئیدارەی ئیئتلافی كەركوك، بۆ بەهاری داهاتوو ، ئاگرەكەی دڵی هەموو نەتەوەكان گەرم دەكاتەوە.
ستران عەبدوڵڵا
قەیوان گروپ
مایۆرکا سیتی جوانییەک لە دڵی سروشتدا
