پۆڵەتیك پرێس
گۆڤاری تایمی ئەمریكی جۆ بایدن و كامالا هاریسی جێگری وەك كەسایەتی ساڵی 2020 دەستنیشانكرد.
گۆڤارەكە لەڕێگەی هەژماری تایبەتی خۆیەوە لە تۆڕی كۆمەڵایەتی تویتەر بەرگی گۆڤارەكەی بڵاوكردەوە كە وێنەی جۆ بایدن، سەرۆكی هەڵبژێردراوی ئەمریكا و كامالا هاریسی، جێگری سەرۆكی لەسەرە و ئاشكرایكرد، بایدن و هاریس بەیەكەوە توانوویانە ببنە كەسایەتی ساڵی 2020.
ئەوەش بۆ یەكەمجارە لە مێژووی گۆڤارەكەدا سەرۆكێكی ئەمریكا و جێگرەكەی بەیەكەوە ببنە كەسایەتی ساڵ.
لەلیستی كاندیدانی گۆڤارەكەدا دۆناڵد ترەمپ سەرۆكی ئەمریكاو چەندین كەسایەتی دیكەش هەبوون، بەڵام بایدن و كامالا پێش ئەوان كەوتوون وتوانیویانە نازناوەكە دەستبهێنن.
جۆو بایدن تەمەنی 78 ساڵە و كاندیدی دیموكراتەكانبوو بۆ پۆستی سەرۆكی ئەمریكا، توانی سەركەوتن لە هەڵبژاردنە سەرۆكایەتییەكەی ساڵی 2020 دا بەدەستبهێنێت، كامالا هاریسی جێگریشی تەمەن 56 ساڵەو بڕیارە دوای سوێندن خواردنی بایدن ببێتە جێگری.