پۆڵەتیک پرێس:
لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress
مەسعود بارزانی سەرۆکی پارتی دیموکراتی کوردستان و خەمیس خەنجەر سەرۆکی هاوپەیمانی سیادە لە سەڵاحەدین کۆبوونەوە و دوایین پێشهاتە سیاسییەکانی عێراقیان تاوتوێکرد.
لەوبارەیەوە بارەگای بارزانی ڕاگەیەندراوێکی بڵاوکردەوە تێیدا ئاماژەی بەوەکرد، ڕۆژی پێنجشەممە 11ی ئابی 2022 لە سەڵاحەدین مەسعود بارزانی پێشوازی لە خەمیس خەنجەر كرد و هەردوولا بیروڕایان لەبارەی دوایین گۆڕانكاری و پێشهاتەكانی ناو پڕۆسەی سیاسیی عێراق ئاڵوگۆڕ كرد و جەخت لەسەر هەماهەنگی و كاری هاوبەشی نێوانیان كرایەوە بۆ دەربازبوون لە چەقبەستوویی سیاسی.
ئەوەش هاتووە، هەر لەو دیدارەدا پەیوەست بە قەیرانی سیاسیی عێراق، هەردوولا ئەوەیان دووپات كردەوە كە هەر دەستپێشخەری و هەنگاوێكی نوێ پێویستە بە ئاراستەی باشتركردنی دۆخی سیاسیی عێراق و كۆتایهاتنی قەیرانی سیاسی بێت.
باس لەوەش کراوە، لەبارەی هەڵبژاردنی پێشوەختەی پەرلەمانی عێراق هەردوولا لەسەر ئەوە هاوڕابوون كە ئەنجامدانی هەڵبژاردنی پێشوەختە هەنگاوێكی باشە بە مەرجێك كە هەموو لایەك پابەندی ئەنجامەكانی بن.