كوردستان وڵاتی چێشتخانە و نەخۆشخانەكان

 

دوای راپەڕین ‌و ئازادبوونی خەڵكی باشووری كوردستان لە دەست ستەمی حكومەتی بەعس، خەڵك هیوای بەوەبوو، لە سایەی ئازادیدا هەنگاو بەرەو پێشەوە بنێت ‌و وەكو میلەتانی تر لە سایەی حوكمی خۆماڵیدا بحەوێتەوە، بەڵام لە ماوەی زیاتر لە چارەكە سەدەیەكی دەسەڵاتی خۆماڵیدا، دەسەڵاتدارانی كورد خەڵكیان فێری تەمبەڵی كرد و لە رێگەی كڕینی وەلائی خەڵك ‌و دامەزراندنی حیزبییەوە، بواریان بۆ داهێنان و پشتبەخۆبەستن نەهێشتەوە.

ئێستا هەر بابایەك دەبینیت، بەدوای ئەوەدا دەگەڕێ‌ كار نەكات و مفتەخۆر بێت، بەو هۆیەشەوە هەموومان شەو و رۆژ خەریكی خواردن و خواردنەوەیەكی لە رادەبەدەرین ‌و بێكارییەكی دەمامكدار هەموومانی راپێچی چەقبەستوویی كردووە، بە جۆرێك كە لە نێوان كەمتر لە دە ساڵدا فڕێدانی پاشماوە و خۆڵ ‌و خاشاك بە رێژەی لەسەدا دووسەد زیادی كردووە، ئەوەش بەڵگەیەكی گەورەیە كە بووینەتە چ جانەوەرێكی مشەخۆر و بێكەڵك و زیانگەیەنەر بە خۆمان ‌و سروشت و وڵاتمان.

بڕۆ بە وردی بە شارەكاندا بگەڕێ، ببینە نیوەی دوكان ‌و بازاڕ و شوێنە قەرەباڵغەكان بوونەتە شوێنی خواردن و خواردنەوە، لەبەر ئەوەش كە ئێمە زۆر بە شێوەیەكی ناتەندروست دەخۆین و دەسەڵاتیش نەك خەمی تەندروستیی خەڵكی نییە، بەڵكو كام خواردن و خواردنەوە خراپترینە لە جیهاندا، لەلایەن بازرگانەكانی حیزب و هەلپەرستەكانەوە هاوردە دەكرێت و دەكرێت بە قوڕگی خەڵكدا، نیوەكەی تری بازاڕ ‌و دوكانەكانیش كراونەتە نەخۆشخانە ‌و كلینیكی و دەرمانخانە.

ئێستا هەر شەقام ‌و شوێنێكی ستراتیژی دەبینیت، هەر باڵەخانەیە و دەچێت بە ئاسماندا، پاش ماوەیەك دەكرێت بە كۆمەڵگەی پزیشكیی و جمەی دێت لە زۆرخۆر و خراپخۆر و ئێكسپایەرخۆرەكان، هەر ئەوەشە وایكردووە، پیشەی تەندروستی و پزیشكی لە ئێستادا بووەتە كارێكی بازرگانیی و یاریی بە ژیانی مرۆڤەكانەوە دەكرێت، بچیتە هەر دەرمانخانەیەك هەزاران جۆر دەرمان و هەر جۆرەش چەندین كۆمپانیای بەرهەمهێنەری هەیە و نازانیت كامیان تەندروستە، (من بۆخۆم حەبێكیان بۆ نەخۆشێكمان پێدام بە نرخێكی گران گوایە دروستكراوی ئەڵمانیایە، كەچی كە دوای ماوەیەك بەدواداچوونم بۆ كرد، ئەو جۆرە حەبە بەهیچ شێوەیەك لە ئەڵمانیادا بوونی نییە ‌و لەوێ‌ دروست ناكرێت).

گوێ‌ بۆ هەر كۆڕ ‌و كۆبوونەوەیەك رابگریت، باس باسی خواردن و خواردنەوەیە ‌و بەدەگمەن نەبێت، كەسێك نابینیت باسی داهێنان و خزمەت بكات، من وای نابینم ئەمە بە رێكەوت بێت، رەنگە سیاسەتێكی وردی لە پشتەوە بێت، بۆ ئەوەی خەڵك تەنها بیری لای ورگی بێت ‌و بەدوای گۆڕانكاریی ‌و چاكسازییدا نەگەڕێ‌، لێرە خواردنەوە كهولییەكان ‌و جگەرە و نێرگەلە نرخیان هێندە هەرزانە، هەموو كەسێك دەرحەوەیان دێت و نرخەكان شتێك لە سەرووی بەلاشەوەن.

سیاسەتی دەسەڵاتە تۆتالیتار ‌و چەوسێنەر ‌و دیكتاتۆرەكان وایە، میلەتەكانیان بە شتگەلێكەوە سەرقاڵ دەكەن كە موعتاد ببن، خۆ ئەگەر وڵاتانی تری دەوروبەرمان میلەتەكانیان گرفتاری تلیاك و مەوادی بێهۆشكەر بكەن، ئەوا دەسەڵاتدارانی لای ئێمە لە رێگەی خواردن و خواردنەوەوە، خەڵكیان تووشی موعتادبوونێك كردووە، كە لە داهاتوودا نەخۆشخانەكانیش ناتوانن چارەسەریان بكەن، بەوەش وەكو كورد دەڵێت (بە بەردێك دوو چۆلەكە دەكوژن)، لەلایەك هەرچی داهات و سامانی ئەم وڵاتەیە، لە رێگەی خواردن و دەرمانەوە لە گیرفانی خەڵك دەردەهێننەوە، لەلایەكی تریش خەڵك لە جیاتی خەباتكردن بۆ رزگاریی، پیشەی شەو و رۆژی دەبێتە خەباتكردن بۆ ورگی.

 

ساڵح ڕەحمان

 

پەخشی راستەوخۆی رادیۆ پۆلەتیک