رۆحانی: هەندێك وڵاتی عەرەبی سەروەری دەدەنە ئیسرائیل

پۆڵەتیك پرێس:

سەرۆككۆماری ئێران رایگەیاند، هەندێك وڵاتی عەرەبی دەیانەوێت سەروەری بدەنە ئیسرائیل لە ناوچەكەدا.

حەسەن رۆحانی سەرۆككۆماری ئێران رایگەیاند، “حكومەتی هەندێك وڵاتی ناوچەكە گەلەكانیان موسوڵمان و لایەنگری ئیسلامن، نە دەزانن ئایین چییە و نە دەزانن بەرپرسیاریەتییەكانیان بەرامبەر گەلەكانی خۆیان و فەڵەستین چیین.”
ئەوەشی خستەڕوو “ئەم وڵاتانە چۆن دەتوانن دەستی رێككەوتن بۆ ئیسرائیل درێژ بكەن كە رۆژ بە رۆژ تاوانەكانی بەرامبەر گەلی فەڵەستین زیاتر دەبن.”

باسی لەوەشكرد “ئەوان دەیانەوێت سەروەری بدەنە ئیسرائیل لە ناوچەكەدا، لەبەرامبەر ئەو ئەنجامە خراپانەی دەكرێت بێنە ئاراوە ئەو وڵاتانە بەرپرسیارن كە سەقامگیری و ئاسایشی ناوچەكەیان پێشێلكردووە.”

دوێنێ، رێككەوتنی ئاشتی لە كۆشكی سپی و بە ئامادەبوونی دۆناڵد ترەمپ لەنێوان ئیمارات و ئیسرائیل لەلایەك و بەحرەین و ئیسرائیل لەلایەكی دیكە واژۆكرا، بەو پێیەش ئەو وڵاتانە پەیوەندییە دیبلۆماسی، بازرگانی و ئابورییەكانیان لەگەڵ ئیسرائیلدا ئاسایی كردەوە.

ساڵی ١٩٧٩ میسڕ و ئیسرائیل رێككەوتنی دیبلۆماسیان واژۆ كرد، دواتریش لە ساڵی ١٩٩٤ ئوردن لەگەڵ ئیسرائیل رێككەوتنی دیبلۆماسی لەسەر بنەمای ئاشتی بەرامبەر ئاشتی ئەنجامدا، بەمەش ئیمارات و بەحرەین دەبنە سێیەم و چوارەم دەوڵەتی عەرەبی كە رێككەوتن لەگەڵ ئیسرائیلدا واژۆ دەكەن.

پەخشی راستەوخۆی رادیۆ پۆلەتیک