مەزڵوم عەبدی: ئامادەی هەر روبەڕوبونەوەیەكی توركیاین

پۆڵەتیك پرێس

لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress

مەزڵوم عەبدی، فەرماندەی گشتی هێزەكانی سوریا دیموكرات (هەسەدە) رایدەگەیەنێت، توركیا لە هەوڵی ئەوەدایە قەیرانی ئۆكرانیاو داوای سوید و فنلەندا بۆ بونە ئەندامی هاوپەیمانی‌ باكوری ئەتڵەسی (ناتۆ) لە بەرژەوەندی خۆی بقۆزێتەوە.

ئەو لێدوانەی‌ عەبدی لە كۆنگرەیەكی رۆژنامەوانیدا هات، كە میدیاكانی‌ سوید و جیهان لەبارەی‌ داواكاری سویدو فنلەندا بۆ بونە ئەندام لە ناتۆ و مەرجەكانی توركیا بۆ بونە ئەندامی ئەو دو وڵاتە لە هاوپەیمانییەكە خستویەتییەڕو.

مەزڵوم عەبدی وتی: تا ئێستا هیچ گۆڕانكارییەك لە هەڵوێستی سویددا بەدی ناكەین لەبارەی‌ بەڕێوەبەرێتی خۆسەر لە رۆژئاوای كوردستان.

هاوكات پێزانینی خۆشی دەربڕیوە بۆ سوید و فنلەندا لەبەرامبەر ئەو پشتیوانییە مەعنەوی و سیاسییەی‌ لە شەڕكردن لەگەڵ داعش بۆ رۆژئاوای كوردستان دەریدەبڕن و هیوای خواستوە بەردەوامی بدەن بەو كۆمەكی و هاوكارییەكانیان.

سەبارەت بە داوای سوید و فنلەنداش بۆ بونە ئەندامی ناتۆ و مەرجەكانی‌ توركیا، عەبدی رایگەیاندوە، ئەوە بابەتێكی ناوخۆییە و رێز لەو بڕیارە دەگرین، بەڵام توركیا دەیەوێت شەڕی ئۆكرانیا و روسیا و داواكاری سوید و فنلەندا بۆ بونە ئەندامی ناتۆ لە بەرژەوەندی خۆی بقۆزێتەوە.

سەبارەت بە هەڕەشەكانی توركیاش بۆ ئەنجامدانی ئۆپراسیۆنی نوێی سەربازی لە ناوچەكانی رۆژئاوای كوردستان، مەزڵوم عەبدی تەئكیدی لەوەكردوەتەوە، ئەو هەڕەشانە بەجدی وەردەگرن و ئامادەی چونە ناو هەر روبەڕوبونەوەیەكی گریمانەكراون.

رونیشیكردوەتەوە، كە ئەوان ئارەزوی هەڵایسانی شەڕ ناكەن لە ناوچەكەو هۆشداریشیداوە لە ئاوارەبونی سەدەها هەزار كەس لە دانیشتوان ئەگەر هەڕەشەكانی توركیا جێبەجێ بكرێت.