پۆڵەتیک پرێس
باخچەیەکی ئاژەڵانی سویسری لەدایکبوونی کیسەڵی گالاپاکۆسی نامۆی ڕاگەیاند، کیسەڵەکە بەهۆی توشبوونی بە بەڵەکی ڕەنگی سپیە و ڕەنگی چاوی سوورە ، ئەمەش وایلێکدەکات ببێتە یەکەم ئاژەڵی لەو جۆرە.
کیسەڵەکە لە باخچەی ئاژەڵەنی “تروبیکواریۆم”ی سێرڤیۆنە کە ناوچەیەکی سویسریە چەند کیلۆمەترێک لە لۆزانەوە دوورە و سەردانیکەرانی پارکەکە بۆ یەکەمجارە دەرفەتیان بۆ ڕەخساوە چێژ لە بینینی کیسەڵە بچووکەکە وەربگرن، لەئێستادا تەمەنی کیسەڵەکە مانگێکە و کێشەکەی نزیکەی 50 گرامە، بەشێوەیەکی ئاسایی پێستی ئەم ئاژەڵە ڕەشە و تائێستا لە سروشت و باخچەکانیشدا نەبینراوە تووشی ئەم بەڵەکیە بۆماوەییە ببێت کە بەرپرسە لە نەبوونی ڕەنگی پێست و گۆڕانی ڕەنگی چاوەکان بۆ سوور، هەندێکجاریش دەبێتە هۆی لەدەستدانی بینین.
فیلیپ مۆرێل خاوەنی باخچەی ئاژەڵانەکە ئاماژەی بەوەکرد تەمەنی کیسەڵە سپییەکە لەوانەیە چەند هەفتەیەک بێت ئەگەر لە سروشتدا بژی، بەڵام هیواخوازە لە باخچەکەدا گەشە بکات و بمێنێتەوە، هێشتا ڕەگەزەکەی بەشێوەیەکی سروشتی دیارینەکراوە.