وەزارەتی نەوت داهاتی مانگی ڕابردوو ڕادەگەیەنێت

پۆڵەتیک پرێس:

وەزارەتی نەوتی عێراق کۆی هەناردەی نەوت و داهاتی مانگی ڕابردووی ئاشکراکرد و ڕایگەیاند، داهاتی نەوت لە مانگی ئاداردا 10 ملیار دۆلاری تێپەڕاندووە.

بەگوێرەی ئاماری کۆمپانیای بەبازاڕکردنی نەوتی عێراقی (سۆمۆ)، مانگی ئاداری ڕابردوو عێراق بڕی 100 ملیۆن و 579 هەزار و 612 بەرمیل نەوتی هەناردەکردووە.

ئەوەش هاتووە، کۆی داهاتی نەوت لە مانگی ڕابردوودا گەیشتووەتە 10 ملیار و 913 ملیۆن و 197 هەزار دۆلار.

باس لەوەش کراوە، کۆی هەناردەی نەوت لە کێڵگەکانی ناوەڕاست و خوارووی عێراق لە مانگی ڕابردوودا گەیشتووەتە 99 ملیۆن و 130 هەزار و 677 بەرمیل، ئەو نەوتەش کە لە کەرکوکەوە بە بەندەری جەیهاندا هەناردەکراوە ملیۆنێک و 448 هەزار و 935 بەرمیل بووە.

هەر بەگوێرەی ئامارەکە، لە مانگی ڕابردوودا یەک بەرمیل نەوتی عێراقی بە 108.503 دۆلار مامەڵەی پێوەکراوە.