پۆڵەتیك پرێس
لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress
جێگری دووەمی سەرۆكی پەرلەمانی عێراق رایگەیاند، لیژنەی لێكۆڵینەوەی پەرلەمانی عێراق لە هێرشەكەی سەر شاری هەولێر كارەكانی تەواوكرد.
شاخەوان عەبدوڵا، جێگری دووەمی سەرۆكی پەرلەمانی عێراق رایگەیاند: لیژنەی لێكۆڵینەوە لەو هێرشە مووشەكییەی كرایە سەر شاری هەولێر، ئیدانەی هێرشەكە دەكات و پێشێلكارییەكی ئاشكرایی سەروەری عێراقە و دووپاتیكردووەتەوە، پێویستە ئێران قەرەبووی زیانلێكەوتووان بكاتەوە.
جێگری دووەمی سەرۆكی پەرلەمانی عێراق وتی: لیژنەكە جەختی لەوە كردووەتەوە، كە پێویستە وەزارەتی دەرەوەی عێراق رێكارەكانی رێگریكردن لە دووبارەبوونەوەی هێرشەكە بگرێتەبەر.
ئاماژەی بەوەشكرد، هێرشەكە ماڵێكی مەدەنی كردووەتە ئامانج و لەلایەن هیچ دەزگایەك بەكار نەهێندراوە.
بەرەبەیانی ڕۆژی13 ی ئادار 12 موشەك ئاڕاستەی شاری هەولێر كران و دواتر سوپای پاسدارانی ئێران بەرپرسیارێتی هێرشەكەی لەئەستۆ گرت و رایگەیاند، ناوەندێكی ستراتیژی ئیسرائیلی بەئامانج گرتووە، بەرپرسانی حكومەتی هەرێمیش پاساوەكەی ئێرانیان بۆ هێرشەكەی رەتكردەوە و رایانگەیاند، ئەو شوێنەی هێرشی كراوەتە سەر ماڵی بارزگانێكی كوردە بە ناوی شێخ باز بەرزنجی كە خاوەنی كار گروپە.