پۆڵەتیك پرێس
لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress
قوباد تاڵەبانی جێگری سەرۆك وەزیران لە پەراوێزی بەشداریكردنی لە كۆڕبەندی نێودەوڵەتی ئابووری دێلفی لە یۆنان لەگەڵ نیكۆس دێندیاس وەزیری دەرەوەی ئەو وڵاتە كۆبووەوە و پێكەوە پرسی وزە و پەرەپێدانی پەیوەندیی ئابوری نێوان دوو وڵاتیان تاوتوێ كرد، هەردوولاش هاوڕابوون لەسەر دەسپێكردنی گەشتی راستەوخۆی نێوان یۆنان و هەرێمی كوردستان.لە بارەی هەناردە كردنی گازی سرووشتی هەرێم قوباد تاڵەبانی رایگەیاند، بەر لە هەر شتێک پێویستە کێشە یاساییەکانمان لەگەڵ بەغدا چارەسەر بکەین.
لە تەوەرێكی سەرەكی كۆبوونەوەكەدا كە رۆژی شەمە 9 ی نیسانی 2022 بەڕێوەچوو، باس لە پرسی وزە و پێگەی كوردستان لەڕووی نەوت و گازەوە كرا، لەمبارەیەوە وەزیری دەرەوەی یۆنان ئاماژەی بەوەدا كە كوردستان لەبەردەم دەرفەتێكی مێژووییدایە بۆ هەناردەكردنی نەوت و گاز بۆ ئەوروپا.
هەرلەم چوارچێوەیەدا قوباد تاڵەبانی جێگری سەرۆك وەزیران رایگەیاند، راستە دەرفەتی مێژوویی لەبەردەم كوردستاندایە، بەڵام حكومەتی هەرێم و حكومەتی فیدرال سەبارەت بە پرسی هەناردەكردنی نەوت و گاز ناكۆكن، هەربۆیە پێویستە سەرەتا كێشە یاساییەكانی نێوان حكومەتی هەرێم و حكومەتی فیدرال چارەسەر بكرێن بۆ ئەوەی هەرێمی كوردستان بتوانێت بەبێ كێشە مامەڵە لەگەڵ ئەم پرس و سامانە سروشتییە بكات.
لە تەوەرێكی دیكەی كۆبوونەوەكەدا باسی هاندانی كۆمپانیا و وەبەرهێنەرانی یۆنانی كرا لە هەرێمی كوردستان وەبەرهێنان بكەن و لەمبارەیەوە جێگری سەرۆك وەزیران جەختی كردەوە، حكومەتی هەرێم كارئاسانی تەواو دەكات بۆ وەبەرهێنەرانی یۆنانی كە دەیانەوێت لە كەرتەكانی پیشەسازی و كشتوكاڵ و گەشتوگوزاردا وەبەرهێنان بكەن.
هەردوولا هاوڕابوون لەسەر دەستپێكردنی گەشتی راستەوخۆی ئاسمانی لەنێوان هەرێمی كوردستان و یۆنان، وەزیری دەرەوەی یۆنان بەڵێنی دا بۆ ئەم مەبەستە لە ماوەیەكی نزیكدا كۆبوونەوە لەگەڵ كۆمپانیاكانی فرۆكەوانی دەكات.
پرۆسەی پێكهێنانی حكومەتی داهاتووی عێراق تەوەرێكی دیكەی كۆبوونەوەكە بوو و هەردوولا هاوڕابوون كە دەبێت لایەنە عێراقییان لێكتێگەیشتنیان زیاتریان هەبێت و بەردەوامیدان بە ناكۆكییەكان نەك تەنها پرۆسەی پێكهێنانی حكومەت دوادەخات بەڵكو سەقامگیری عێراقیش دەخاتە مەترسییەوە.
لە كۆبوونەوەكەدا هەر یەكە لە ئومێد سەباح سەرۆكی دیوانی ئەنجومەنی وەزیران و ئەمەل جەلال سەرۆكی دەستەی گەشتوگوزاری هەرێم و دابان شەدەڵە جێگری فەرمانگەی پەیوەندییەكانی دەرەوەی هەرێم یاوەری قوباد تاڵەبانی بوون.
قەیوان گروپ
مایۆرکا سیتی جوانییەک لە دڵی سروشتدا
