هەڵوێستی ئەمریكا دەربارەی سەردانەكەی ئەسەد بۆ ئیمارات

پۆڵەتیك پرێس

لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress

سەردانەكەی سەرۆكی سوریا بۆ میرنشینە یەكگرتووەكانی عەرب (ئیمارات) ئەمەریكای نیگەران كردووە و داوا لە هاوپەیمانەكانی دەكات خۆیان دووربگرن لە ئاساییكردنەوەی پەیوەندییەكانیان لەگەڵ ڕژێمێكدا كە تۆمەتبارە بە ئەنجامدانی ” دڕندایەتی ترسناك.”

نێد برایس، وتەبێژی وەزارەتی دەرەوەی ئەمەریكا ڕۆژی شەممە لە بەیاننامەیەكیدا كە بۆ ئاژانسی فرانس پرێسی ناردووە رایگەیاند: ئێمە بە قوڵی نائومێد و نیگەرانین لەو هەوڵە ئاشكرایە بۆ ڕەوایدان بە بەشار ئەسەد.

وتیشی: ئەسەد بەرپرسیارە بەرامبەر مردن و مەینەتییەكانی خەڵكێكی ئێجگار زۆری سوریا، ئاوارەبوونی زیاتر لە نیوەی دانیشتووانی وڵاتەكە و گرتن و بێسەروشوێنكردنی هەڕەمەكی زیاتر لە 150 هەزار پیاو، ژن و منداڵی سوریایی.

برایس لە بەیاننامەكەیدا دەشڵێت هەروەكو وەزیری دەرەوە، ئەنتۆنی بلینكن دووپاتی كردووەتەوە، ئێمە پشتیوانی هەوڵەكان بۆ بۆژانەوەی ئەسەد ناكەین و پشتیوانی لە لایەنەكانی تریش ناكەین پەیوەندییەكانیان ئاسایی بكەنەوە.

ڕۆژی هەینی سەرۆكی سوریا بەشار ئەسەد لەگەڵ فەرمانڕەوای دوبەی شێخ محەمەد بن ڕەشید ئال مەكتوم لە دوبەی كۆبۆتەوە، ئەمەش یەكەمین سەردانی ئەسەدە بۆ وڵاتێكی عەرەبی لە دوای دەستپێكردنی شەڕی سوریاوە لە ساڵی 2011 دا.

پەخشی راستەوخۆی رادیۆ پۆلەتیک