پۆڵەتیک پرێس:
لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress
بافڵ جەلال تاڵەبانی ڕایگەیاند، “بەداخەوە جارێکی تر ئارامی و ئاسایشی هەرێمی کوردستان کرایە ئامانج و شاری هەولێری خۆشەویست روبەڕوری هێرشێکی تیرۆریستی بووەوە، بەتوندی ئیدانەی ئەو هێرشانە دەکەم و هیوای سەلامەتی بۆ خەڵکی خۆشەویستی هەولێر دەخوازم”.
ئەمڕۆ یەکشەممە لە ڕاگەیەندراوێکدا بافڵ جەلال تاڵەبانی وتی، “دوبارەبوونەوەی ئەو هێرشانە مایەی نیگەرانییە و ئاماژەیەکی رووونە بۆ تێکدانی سەقامگیری هەرێمی کوردستان، ئەرکی هەمومانە پێکەوە پارێزگاری لە خاک و خەڵکەکەمان بکەین و روبەڕوی تەحەدییەکان بوەستینەوە”.
جەختی لەوەشکردەوە، “پاراستنی ئاسایشی هەولێر و سەلامەتی گیانی خەڵكەكەی بە ئەركی خۆمان دەزانین، یەكێتیی نیشتیمانیی كوردستان ئامادەی هەمو پشتیوانی و هاوكارییەكە بۆ دۆزینەوەی تاوانباران و ئەنجامدەرانی هێرشە تیرۆریستییەكە”.
ئەوەش لەکاتێکدایە پێشتر وەزارەتی ناوخۆی حکومەتی هەرێمی کوردستان ڕایگەیاند، “شەوی 12/13ی ئاداری 2022، پاش کاتژمێر یەکی بەرەبەیانی، 12 مووشەکی دوورمەودای بالیستی لە سنوورەکانی دەرەوەی عێراق، لە ڕۆژهەڵاتەوە ئاراستەی باڵەخانەی نوێی کونسوڵخانەی ئەمریکی لە هەولێر کران”.