پۆڵەتیك پرێس
وەزارەتی كارەبای هەرێم رایگەیاند، هەر كارمەندێكی وەزارەتەكەیان، ڤاكسینی وەرنەگرتبێت ئەوا لە سبەینێوە ڕێگای پێنادرێت بچێتەوە سەر كارەكەی.
وەزارەتی كارەبای حكومەتی هەرێم رایگەیاندووە، پشت بەست بە بڕیار و راسپاردەكانی لیژنەی باڵای بەرەنگاربوونەوەی كۆرۆنا، هەر فەرمانبەرێك، ڤاكسینی وەرنەگرتبێت رێگەی پێ نادرێت دەوام بكات.
ئاماژەی بەوەشكرد، تەنانەت ئەو هاوڵاتیانەشی ڤاكسینیان وەرنەگرتووە، ناتوانن سەردانی بەڕێوەبەرایەتی و فەرمانگەكانی كارەبا بكەن.
دەشڵێت، “ئەم بڕیارە لە ڕۆژی یەكشەممەوە 23ی 1، بەبێ جیاوازی لەلایەن بەڕێوەبەرایەتیی گشتیی دیوانی وەزارەتی كارەباوە جێبەجێ دەكرێت و هەر كارمەندێك ڤاكسینی وەرنەگرتبێت ئەوا رێگەی پێنادەن بچێتەوە سەر كارەكەی”.
پێشتر ئەنجومەنی وەزیرانی هەرێم بڕیاریدا سەرجەم فەرمانبەران تاوەكو 31-12-2021 ڤاكسین وەربگرن، دواتر لیژنەی باڵای رووبەڕووبونەوەی كۆرۆنا بڕیاریدا بەدرێژكردنەوەی ماوەی وەرگرتنی ڤاكسین لەلایەن گشت فەرمانبەرانی حكومەت، بە هەردوو ڕاژەی شارستانی و سەربازی، تاوەكو ٢٠ی كانوونی دووەمی ٢٠٢٢، هەر فەرمانبەرێكیش پابەند نەبێت ئەوا بەپێی یاسای تەندروستی گشتی و بەرزەفتی فەرمانبەران مامەڵەیان لەگەڵ دا دەكرێت.