پۆڵەتیك پرێس:
لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress
پاشنیوەڕۆی رۆژی چوار شەممە، شاندی هاوبەشی پارتی دیموكراتی كوردستان و یەكێتی نیشتمانی كوردستان لە بارەگای مەكتەبی سیاسی پارتی كۆبوونەوە.
بەپێی راگەیەندراوی كۆبوونەوەكە، دوای گفتوگۆ و راگۆڕینەوە، هەردوولا رێككەوتن كە پارتی و یەكێتی پێكەوە بە شاندێكی هاوبەشی كوردستانی پرۆسەی دانوستاندن لەگەڵ هێز و لایەنە سیاسیە عێراقییەكان بۆ پێكهێنانی كابینەی نوێی حكوومەتی فیدراڵ دەستپێبكەن، بۆ ئەم مەبەستەش وەرەقەیەكی كاری هاوبەش ئامادەكراوە.
پاش كۆتایی هاتنی كۆبونەوەكە عیماد ئەحمەد ئەندامی مەكتەبی سیاسی یەكێتیی نیشتمانیی كوردستان وتی: گفتوگۆی جدی ئێمە لەسەر مافی هاوڵاتیانی كوردستانە و كە دەچینە بەغدا بۆ پاراستنی مافی كورد دەچین و هەوڵدەدەین شایستەكانی ئەم هەرێمە لەبەغدا بەدەستبهێنین و بتوانین ببینە هاوبەشێكی راستەقینەی عیراقێكی نوێی دیموكرات و فیدراڵ.
هاوكات وشیار زێباری ئەندامی مەكتەبی سیاسی پارتی دیموكراتی كوردستان بۆ رۆژنامونوسان وتی: لە كۆبونەوەكەدا پرۆسەی سیاسی عێراق و پەیوەندی نێوان یەكێتی و پارتی باسی لێوەكراوە و تەئكیدمان لەسەر ئەوە كردەوە كەدەبێت پیكەوە كاربكەین و دانوستان بكەین لەگەڵ بەغدا.
وتیشی: ئەندامانی پەرلەمانی نوێی عێراق كۆدەبنەوە و كاركردن لە حكومەتی داهاتوو لەوێوە دەستپێدەكات و یەكێتی و پارتی پێكەوە كاردەكەین و پێمان خۆشە هێزەكانی تریش بەشدار و پشتیوان بن تا یەك دەنگ بین لەبەغدا و پێكەوە دەنگمان بەهێزتر دەبێت.
لایەنە كوردستانییەكان لە هەڵبژاردنی10_10_2021، 63 كورسییان بەدەستهێنا، پارتی دیموكراتی كوردستان 31 كورسی، یەكێتیی نیشتیمانیی كوردستان 18 كورسی، نەوەی نوێ 9 كورسی، یەكگرتووی ئیسلامیی 4 كورسی، كۆمەڵی دادگەریی 1 كورسییان.
بڕیارە رۆژی یەكشەممە 9-1-2022، یەكەم كۆبوونەوەی خولی نوێی ئەنجوومەنی نوێنەرانی عێراق بكرێت، بەڵام هێشتا دیار نییە لەو كۆبوونەوەیە كە بەپێی دەستووری عێراق سەرۆك و جێگرانی سەرۆكی ئەنجوومەنی نوێنەرانی عێراق هەڵدەبژرێردرێت، ئەو كارە دەكرێت یان نا، چونكە هێشتا پێكهاتەی سوننە كە پشكی سەرۆكی ئەنجوومەنی نوێنەرانی عێراقیان بەردەكەوێت، یەكلاییان نەكردووەتەوە.