کارەبا دەدرێت بە کەرتی تایبەت

پۆڵەتیک پرێس

ئەمڕۆ دووشەممە، ئەنجومەنی وەزارەتی کارەبا یەکەمین کۆبوونەوەی خۆی ئەنجامداو بڕیاردرا، رۆسەی بە تایبەتیکردنی بەشی دابەشکردنی کەرتی کارەبا، لە ماوەی ئەمساڵدا دەکەوێتە بواری جێبەجێکردنەوە.

ئەمڕۆ دووشەممە 3-1-2022،  دوای ئەنجامدانی یەکەمین کۆبوونەوەی، ئەنجومەنی وەزارەتی کارەبا چەند بڕیارێکی گرنگ درا، لە کۆبوونەوەکەدا، کەمال محمد ساڵح وەزیری کارەبا سوپاسی تیمەکانی کارەبای کرد، کە لە رۆژانی پشووی سەری ساڵدا، دەیان کرێکار و فەرمانبەری کۆنترۆڵ و سیانە و وێستگەکان، 24 کاتژمێر لە خزمەتی هاووڵاتیاندا بوون.

ئەو بڕیارو ڕاسپاردانەی لە کۆبوونەوەکە دەرکران بریتیبوون لە:

  • ئاستی بەرهەمهێنانی کارەبا لە سەرەتای ساڵی نوێ بۆ 3373 مێگاوات بەرز بووەتەوە. ژێرخانی بەرهەمهێنانی کارەبای زیاترمان هەیە، بەڵام بەهۆی کێشەی سوتەمەنی نەتوانراوە تا ئەم ئاستە بەرهەم بینین.
  • راگەیاندنەکانی وەزارەت لە ماوەی ساڵی رابردوودا، بە راستگۆیی و شەفاف، هەواڵ و زانیاری و داتای کەرتی کارەبایان خستووەتەڕوو.
  • لێخۆشبوونی لە 15% کرێی کارەبا کە تا کۆتایی ساڵ درێژ کرابووەوە، کاریگەرییەکی باشی بۆ سەر گەڕانەوەی قەرزەکان هەبوو.
  • پلان و بەرنامەکانی ساڵی نوێی وەزارەت خرانەڕوو، کە لە دەیان پرۆژەی دانانی وێستگە، راکێشانی هێڵی کارەبا و زیادکردنی ئاستی بەرهەمهێنانی کارەبا لەوانە بە وزەی خۆر و هیدرۆپاوەر پێک دێن.
  • پرۆژەی پێوەری زیرەک تا ئێستا 80% تەواو بووە، لە نیوەی یەکەمی ئەمساڵ بە یەکجاری بە کۆتایی دێت.
  • هەڵمەتی نەهێشتنی سەرپێچییەکانی سەر تۆرەکانی کارەبا دەست پێ دەکرێتەوە.
  • سیستەمی دەستنیشانکردنی سەرپێچییەکان لە تۆڕی پێوەری زیرەک کارا دەکرێت.
  • لەگەڵ زیادبوونی ژمارەی هاوبەشانی کارەبا، پێویستە 300 هەزار پێوەری دیکەش دابنرێت.
  • پرۆسەی بە تایبەتیکردنی بەشی دابەشکردنی کەرتی کارەبا، لە ماوەی ئەمساڵدا دەکەوێتە بواری جێبەجێکردنەوە.

 

پەخشی راستەوخۆی رادیۆ پۆلەتیک