کێشەی کەمی غاز لە سلێمانی چارەسەر دەکرێت

پۆڵەتیک پرێس

بەڕێوبەری نەوت و کانزاکان لە سلێمانی ڕایگەیاند، هەفتەی داهاتوو کێشەی کەمی غاز لە سلێمانی چارەسەر دەکرێت.

محەمەد حەسیب، بەڕێوبەری نەوت و کانزاکانی سلێمانی بە میدیای یەکێتی ڕاگەیاند، رۆژی یەکشەممەی داهاتوو کێشەی نەبوونی غاز لە سلێمانی چارەسەر دەکرێت.

ئاماژەی بەوەشدا، هەوڵی تەواویان داوە بۆ چارەسەرکردنی کێشەکە، هەروەها سزای هەر کەسێک دەدەین کە نرخی غاز بەرز بکاتەوە، لە ئێستادا نرخی یەک بوتڵ غاز بە هەشت هەزار و 500 دینارە.

وتیشی، بەدواداچوون دەکەن سەبارەت بە کێشەکە، لە ساڵی نوێوە بەپێی خشتەی نوێ غاز بەسەر ماڵاندا دابەش دەکرێت و ڕێگە لەم کەمبوونەوەی بەشە غازی هاوڵاتیان دەگرن بە هەر بیانوویەک بێت.

ماوەیەکە لە سلێمانی کێشەی کەمی غاز هەیە، قائیمقامیەتی سلێمانی لە رێگەی لیژنەیەكی تایبەتەوە رۆژانە سەردانی كارگەكانی غازی ماڵان دەكات و لەكاتی هەبوونی سەرپێچیدا شوێنەكە و خاوەنەكەشی رووبەڕووی رێكاری یاسایی دەكاتەوە.

پەخشی راستەوخۆی رادیۆ پۆلەتیک