ئاسایش بكوژانی ژنێك لە سلێمانی دەستگیردەكات

پۆڵەتیك پرێس:

لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress

بەڕێوەبەرایەتی ئاسایشی سلێمانی رایگەیاند توانیویانە تۆمەتبارانی كوشتنی ئەو ژنە دەستگیربكەن كە لە چەند رۆژی رابردوودا لەسەر رێگای سەرەكی بەكرەجۆ تەرمەكەی فڕێدرابوو.

لە راگەیەندراوێكدا بەڕێوەبەرایەتی ئاسایشی سلێمانی رایگەیاند: سەرلەبەیانی رۆژی 13_12_2021، زانیاریمان پێگەیشت لە بوونی تەرمی ژنێكی نەناسراو لەسەر رێگای سەرەكی گەرەكی بەكرەجۆ، دەست بەجێ تیمەكانی بەڕێوەبەرایەتی ئاسایشی سلێمانی دەستیان كرد بە كاری لێكۆڵینەوە و بەدواداچوون، لەماوەی كەمتر لە 48 سەعات توانرا دوو تۆمەتبار دەستگیر بكرێن بەناوەكانی ( خ، ح، ع ) و ( د، خ، ق ).

لە راگەیەندراوەكەدا هاتووە، لە ئەنجامی لێكۆڵینەوە دانیان نا بە تاوانەكەیاندا و پێناسی تاوان لێكراویان ئاشكرا كرد كەناوی ( د، ت، ع ) لەدایك بووی ساڵی 2003 یە، تۆمەتباران لە وتەكانیاندا دەریان خست كە پێشتر یەكتریان ناسیوە و تاوانلێكراو لای تاوانباری سەرەكی لە یەكێك لە كافتریاكانی شاری سلێمانی بە ناوی كافتریای ( لاس فیكاس ) لە شەقامی سالم كاری كردووە.

ئەوەشخراوەتە ڕوو، شەوی تاوانەكە پێكەوە بوون لەماڵی تۆمەتبار ( د، خ، ق ) وە لە بەرەبەیاندا كێشە دەكەوێتە نێوانیان و لە ئەنجامدا تۆمەتبار ( خ، ح، ع ) بە بەكارهێنانی چەك هەڵدەستێ بە كوشتنی تاوانلێكراو (د، ت، ع ) پاشان بە ئوتۆمبیلەكەی تەرمەكەی دەگوازێتەوە بۆ ئەو شوێنەی كە تەرمەكەی تیدا دۆزرابوویەوە ، پاشان هەوڵی خۆ حەشار دانی داوە.

بەڕێوەبەرایەتی ئسایشی سلێمانی روونیكردووەتەوە، لە ئێستادا تۆمەتباران لەسەر بڕیاری دادوەر بەپێی ماددەی 406 لە یاسای سزادان بەندكراون و لێكۆلینەوە بەردەوامە لەگەڵیان.

پەخشی راستەوخۆی رادیۆ پۆلەتیک