وەزیری پەروەردە: داوای لێبوردن ناكەم

پۆڵەتیك پرێس

لە تێلیگرام یەکەم کەسیت هەواڵەکانت پێدەگات جۆینبە https://t.me/Politicpress

وەزیری پەروەردەی حكومەتی هەرێمی كوردستان لەبارەی ئەو دەستەواژەیەی لە كتێبی كوردیی پۆلی 10ـی ئامادەیی بووەتە جێگەی رەخنە دەڵێت، بەڵێ ئەوەی رەخنەی لێگیراوە لادەبرێت “بەڵام من ئەو هەڵەیەم نەكردووە و لەسەر ئەوە داوای لێبووردن لە حیزبی سیاسیی ناكەم.”

ئەمڕۆ دووشەممە 13-12-2021 ئالان حەمە سەعید وەزیری پەروەردە كۆنگرەیەكی رۆژنامەوانی ئەنجامدا و لەبارەی چەند بابەتێكی پەیوەست بە خوێندن و دابینكردنی پێداویستییەكانی خوێندن لە قوتابخانەكان روونكردنەوەی دا.

وەزیری پەروەردە لەبارەی ئەو دەستەواژەیەی كە بووەتە جێگەی رەخنە لە دەروێشی عەڤدی كە داستانێكی كوردییە دەڵێت، “حاشا دكەم ل دینێ (موحەمەدی) ساف ئەز (ئێزدی) مە.” وتی ” هەڵەیەك وەك وەزیری پەروەردە من نەمكردووە، ئەگەر بابەتەكە ئاییندارییە و پابەندبوونە بە دین من لە هەموو كەس زیاتر خۆم بە خزمەتكاری دین دەزانم.”

لە بەشێكی دیكەی قسەكانیدا ئاماژەی بەوەدا “من داوای لێبووردن لەكێ بكەم كە نە من وەك وەزیری پەروەردە بە سیفەتی وەزیر كردوومە نە وەك خۆیشم ئەم هەڵەیەم نەكردووە، بۆیە شتێك كراوە هەڵەبووە، گوناح بووە و خراپ بووە، من داوای لێبووردن لە كێ بكەم؟ بۆیە كارێك كە من بڕیارم لەسەر نەداوە بەڕاستی داوای لێبووردن لە حیزبی سیاسیی ناكەم.”

پێشتر وەزارەتی پەروەردەی هەرێمی كوردستان لە راگەیێنراوێكدا رایگەیاند كە ئەو دەستەواژەیەی لە كتێبی كوردیی پۆلی 10ـی ئامادەیی بووەتە جێگەی رەخنە بۆ ئەمساڵی خوێندن لادەبرێت، هاوكات پێداچوونەوە بە كتێبەكەدا دەكەن و بۆ ساڵی نوێی خوێندن، كتێبێكی دیكە دەخوێندرێت.

پەخشی راستەوخۆی رادیۆ پۆلەتیک