پۆڵەتیک پرێس
ئەمڕۆ شەممە بە بەشداری دەیان کەسایەتی گرنگ، کۆنگرەی دیالۆگی عەرەبی – کوردی لە بەغدا دەستی پێکرد، ئامانجیش ئەوەیە دیالۆگێکی دیموکراتی و پێکەوەیی و ئاشتییانە بکاتەوە لە نێوان هەردوو نەتەوەی کورد و عەرەب لەسەر بنەمای پێکەوە ژیان و کۆمەڵگای دیموکراتی.
لە کۆنگرەکەدا زیاتر لە دەیان میوان کە لە کەسانی ئەکادیمی، ڕۆشنبیر، نوسەر، کەسایەتی سیاسی و کۆمەڵایەتی، لە سەرجەم پارێزگاکانی عێراق و هەرێمی کوردستانەوە بەشداریان کردبوو، هەروەها لە هەردوو نەتەوەی کورد و عەرەب و سەرجەم پێکهاتە نەتەوەیی و ئاینییە جیاوازەکانی عێراق پێکهاتبوون.
کۆنگرەکە ماوەی یەک ڕۆژ دەخایەنێت واتە هەتا ئێوارەی ئەمڕۆ بەردەوامدەبێت. کۆنگرەی بەرەو دیالۆگی عەرەبی – کوردی سەرکەوتوو، لە دووپ پانێڵ پێکدێت هەروەها چەند تەوەرێک لە خۆ دەگرێت کە بریتین لە
تەوەرەکانی پانێڵی یەکەم “خەباتی هاوبەشی عەرەب و کورد بەدرێژایی مێژوو” کە لەلایەن د.سەیف عەدنان کازمەوە پێشکەشدەکرێت، تەوەری دووەم ” کاریگەری دەوڵەت-نەتەوە لەسەر پەیوەندی عەرەب و کورد” کە لەلایەن د. عەلی مەهدییەوە پێشکەشدەکرێت، تەوەری سێییەم ” کاریگەریی سیاسەتی داگیرکاریی نێودەوڵەتی و مەترسییەکانی پرۆژەی عوسمانی نوێ لەسەر عێراق” کە لەلایەن حەسەن جودییەوە پێشکەشدەکرێت، تەوەری چوارەمیش ” ڕۆڵی ژنانی عەرەب و کورد، لە گۆڕینی هزری کۆمەڵگەی عێراق” کە لەلایەن نەجیبە قەرەداغییەوە پێشکەشدەکرێت.
تەوەرەکانی پانێڵی دووەم ” چەمکی جەنگ و ئاشتی” کە لەلایەن شۆڕش عەباچییەوە پێشکەشدەکرێت” تەوەری دووەم “ململانێی هاوبەشی نێوان عەرەب و کورد لە ئێستادا” کە لەلایەن پرۆفیسۆر حیکمەت حەبیبەوە پێشکەشدەکرێت، تەوەری سێیەم”گرنگی شۆڕشی هزری دیموکراسی لە عێراق، ناسیۆنالیزم، ئاین، نەتەوە ” کە لەلایەن شێخ ئازاد عەبدالەوە پێشکەشدەکرێت، تەوەری چوارەمیش ” دەوڵەتی هاوڵاتییبوون و نەتەوەی دیموکراتیک، پرۆژە چارەسەرییە پێشنیارکراوەکان بۆ ستراتیژی ناوچەکە” کە لەلایەن د.کامیران بەروارییەوە پێشکەشدەکرێت.
لە کۆتاییشدا ئەنجامەکانی کۆنگرەکە لە بەیاننامەیەکدا، لە کۆنگرەیەکی ڕۆژنامەوانیدا بۆ ڕایگشتی دەخرێتەڕوو.