پۆڵەتیک پرێس:
یوری ئۆشاکۆڤ، یاریدەدەری سەرۆکی روسیا بۆ کاروباری نێودەوڵەتی رایگەیاند، “بڕیارە لەدوای سەردانەکەی ڤلادمیر پوتنی سەرۆکی روسیا بۆ هندستان، دانوستانی نێوان پوتن و جۆ بایدن سەرۆکی ئەمریکا بەڕێوەبچێت”.
یوری ئۆشاکۆڤ لەبارەی پرسیاری ئەوەی ئایا دوای سەردانەکەی بۆ هندستان، ڤیدیۆ کۆنفرانسی نێوان بایدن و پوتن بەڕێوەدەچێت؟ بە میدیاکانی وت: “بەڵی لەدوای سەردانەکەی هندستان، کار لەسەر ئەوە دەکرێت”.
وتیشی: ئێمە کار بۆ رێکخستنی کۆنفرانسی ڤیدیۆیی نێوان پوتن و بایدن دەکەین و پێدەچێت لە داهاتوویەکی نزیکدا و لە چەند رۆژی داهاتوودا بەڕێوەبچێت.
بڕیارە رۆژی 6ی ئەم مانگە ڤلادمیر پوتن سەردانی هندستان بکات بەمەبەستی پتەوکردنی پەیوەندییەکانی نێوان روسیا و ئەو وڵاتە و تاوتوێکردنی دۆسیە نێودەوڵەتییەکان لەگەڵ ناریندرا مودی، سەرۆک وەزیرانی هندستان.