پۆڵەتیک پرێس
ئەنجومەنى باڵاى دادوەرى عێراق رایگەیاند، دوو وەزیرى پیشووى کابینەکەى عادل عەبدولمەهدى لەبارەی پرسى لێکۆڵینەوە لەکوشتنى خۆپیشاندەرانی ساڵی رابردوو بانگهێشتکراون.
ئەنجومەنى باڵاى دادوەرى عێراق راگەیەندراوێکی بڵاوکردەوە و تیایدا هاتووە، فایەق زێدان سەرۆکى ئەنجومەنەکە لەگەڵ هەریەک لە عەبدولوەهاب ساعدى سەرۆکى دەزگاى روبەڕوبوونەوەی تیرۆر و قاسم ئەعرەجیى راوێژکارى ئاسایشى نەتەوەیى و عەبدولغەنى ئەسەدى سەرۆکى دەزگاى ئاسایشى نیشتیمانى، لەکۆبونەوەیەکدا گفتوگۆى لەبارەى دۆسییەى بەدادگا گەیاندنى تۆمەتبارانى کوشتنى خۆپیشاندەران کردووە.
ئاماژە بەوەشکراوە، ئامادەبووانى کۆبوونەوەکە باسیان لە گرتنەبەرى رێوشوێنە یاساییەکانی پەیوەست بەڕوداوەکانى کوشتنى خۆپیشاندەران و کارمەندانى هێزە ئەمنیەکان کردووە.
ئەوەش خراوەتەڕوو، دەستەى لێکۆڵینەوەى یاسایى لەڕەسافە بۆ روونکردنەوە و وەرگرتنى زانیارى پەیوەست بەلێکۆڵینەوە لەو پرسەدا، هەریەکە لە وەزیرەکانى ناوخۆ و بەرگریى کابینەکەى عادل عەبدولمەهدى بانگهێشتکردووە.
باس لەوەشکراوە، دەستەى لێکۆڵینەوە فەرمانى دەستگیرکردنى بۆ چەند کارمەندێکى سەر بەوەزارەتەکانى بەرگرى و ناوخۆ دەرکردووە، بەڵام بەپێى یاسا پێویستى بەڕەزامەندى فەرماندەى گشتى هێزە چەکدارەکان و وەزیرى ناوخۆ هەیە.
دەشڵێت، چەندین ئەفسەر بەمەبەستى لێکۆڵینەوە لەو پرسەدا راگیراون و ژمارەیەک تۆمەتبارى دیکەش لەلایەن دادگاى تەمیزەوە وردبینى لەدۆسییەکانیاندا دەکرێت.
لەخۆپیشاندانەکانى ساڵى ڕابردوودا کە لەلایەن عێراقیە ناڕازییەکانەوە بەشۆڕشى تشرین ناو دەبرێت و لەو مانگەوە دەستیانپێکرد و ناو بەناو تا ئێستاش بەردەوامە، بەهۆى گازى فرمێسک ڕێژى هێزە ئەمنییەکان و تەقەى قەناس بەدەستە نەناسراوەکانەوە زیاتر لە 550 کەس کوژران و بەهەزارانیش بریندار بوون.
ساڵی رابردوو، کۆمەڵێک خۆپیشاندان لە شارەکانی ناوەڕاست و باشوری عێراقدا روویاندا، کە تیایدا بەهۆی تەقەی قەناس بەدەست و کەسانی نەناسراوەوە، زیاتر لە ٥٥٠ کەس کوژران و هەزاران کەسیش برینداربوون.